Aravot.am-ի տեղեկություններով, 2010-2021թթ. Այնթապ համայնքի ղեկավարի պաշտոնը զբաղեցրած Կարեն Սարգսյանին վերագրվում է պաշտոնական լիազորությունների չարաշահում: Այս տարեսկզբին քրեական վարույթ է նախաձեռնվել հնարավոր չարաշահումների դեպքով:
Նախաքննական մարմնին հասած տվյալների համաձայն՝ Կարեն Սարգսյանն այլ անձանց օգտին ցանկալի արդյունքի հասնելու նպատակով, իր իշխանական և ծառայողական լիազորություններն ի վնաս պետական շահերին օգտագործելով՝ պետական սեփականություն հանդիսացող հողամասերի վերաբերյալ պաշտոնական շրջանառության ենթակա փաստաթղթում մտցրել է ակնհայտ կեղծ տեղեկություններ, որի արդյունքում օտարվել են ՀՀ սեփականություն հանդիսացող գույքեր, ինչի հետևանքով էական վնաս է պատճառվել ՀՀ օրինական շահերին։
Մեր տեղեկություններով՝ Կարեն Սարգսյանը ՌԴ-ում է: Այնթապ վարչական շրջանի ներկայիս ղեկավար Գեղամ Հովհաննիսյանը մեզ հետ զրույցում ասաց, որ քննությունը կպարզի իրողությունը, բայց չի բացառվում, որ չարաշահումների մասին տվյալները լինեն նաեւ թյուրիմացություն: Այլ տեղեկություններ քրեական վարույթին վերաբերող Հովհաննիսյանը չհայտնեց:
Արփինե ՍԻՄՈՆՅԱՆ
