«Մեր ձեւով» շարժման համակարգող Նարեկ Կարապետյանը դրական է համարում Թուրքիայի հետ սահմանի բացումը: Այսօր լրագրողներն ասուլիսում նրանից հետաքրքրվեցին՝ Ադրբեջանի հետ առեւտրաշրջանառությանը՝ հատկապես բենզինի ներմուծմանը ինչպես է վերաբերվում եւ հարց ուղղվեց՝ իրենց՝ իշխանության գալու պարագայում Ադրբեջանի հետ առեւտուրը շարունակվելո՞ւ է, թե՞ ոչ:
Ի պատասխան՝ Կարապետյանն ասաց. «Ադրբեջանի հետ առեւտրի հարցում մտավախություն կա. նավթի ու բենզինի գնումը պետք է լինի ավելի լայն շրջանակային պայմանավորվածության՝ հայ-ադրբեջանական տնտեսական ու մյուս հարաբերությունների կարգավորման համատեքստում: Մենք ունենք առաջնային գերիների հարց, արցախահայերի իրենց հայրենիք վերադառնալու անվտանգության ապահովման հարց: Հնարավոր է իրար հետ աշխատել միայն այն պարագայում, եթե հայկական ապրանքն էլ գնալու է Ադրբեջան: Իրե՞նք կառնեն մեր ապրանքը նույն քանակությամբ, եթե կառնեն՝ ուրախությամբ, կարելի է»:
Կարապետյանն անդրադարձավ նաեւ էկոնոմիկայի նախարարի ներկայացրած ցանկին, թե Ադրբեջանի հետ բանակցությունների արդյունքում ինչ է քննարկվում ՀՀ-ից արտահանել Ադրբեջան՝ ալյումինի փայլաթիթեղի հումքի, ֆերոմոլիբդենի, ընտանի կենդանիների, կոնյակի հումքի, ծխախոտի, տեքստիլ արտադրանքի արտահանման հնարավորություններ:
Կարդացեք նաև
«Ցանկում նշվում է գյուղմթերք: Ադրբեջանը տարածաշրջանի ամենաէժան գյուղմթերք արտադրող երկրներից է, գազ՝ համարյա անվճար է այդ երկրում: Ադրբեջանին առաջարկել են ալյումինի ֆոլգա. կա Սումգայիթի գործարան, որը զբաղվում է ֆոլգայի արտադրության պլանավորմամբ: Ադրբեջանը ալյումին արտադրող մեծ երկիր է: Կոնյակի հումք: Դա նշանակում է հումքդ վաճառում ես հարեւան երկրին, դրանով նա հնարավորություն է ստանում, օրինակ՝ Աղդամում (ժամանակին այնտեղ կոնյակի գործարան է եղել) Աղդամում կոնյակ լցնել: Հայաստանից այն, ինչ իրենք առաջարկել են, տնտեսական առումով ինքնարժեքների ցիկլին չտիրապետող մարդը միայն կարող է հավատալ, որ Ադրբեջանը մեզնից, օրինակ գյուղմթերք՝ լոլիկ է առնելու, այն դեպքում, երբ ամբողջ տարածաշրջանին ինքն է մատակարարում»:
Կարապետյանը շեշտեց, որ հարեւանների հետ հարաբերությունների կարգավորումը արմատական նշանակություն ունի իրենց համար, բայց այդ հարաբերությունների միակողմանիությունը իրենց դուր չի գալիս:
Կարապետյանն անդրադարձավ նաեւ թոշակների բարձրացման, ԵԱՏՄ-ի հետ համագործակցության շարունակությանը վերաբերող հարցերին:
«Ես ասել էի՝ մեր երկրի վարչապետը չպետք ստանա աշխատավարձ եւ պարգեւավճար: Դա հարգանք է սեփական ժողովրդի նկատմամբ, քանի որ երկրում կա 20 տոկոսից ավելի մեծ աղքատություն: Ժամանակին ասում էին՝ մեր երկրում 3 միլիոն վարչապետ կա, մենք երեք միլիոն վարչապետ ունենք, բայց միայն մեկն է այսօր պարգեւավճար ստանում, ինչի՞ համար»,- հավելեց Կարապետյանը:
Արփինե ՍԻՄՈՆՅԱՆ
