Առողջապահության նախարար Անահիտ Ավանեսյանը խորհրդարանում լրագրողների հետ ճեպազրույցում անդրադարձավ իր պարին՝ Նիկոլ Փաշինյանի հեղինակած երգի ներքո։
Հարցին՝ ի՞ր նախաձեռնությունն էր, թե՞ Նիկոլ Փաշինյանի, Անահիտ Ավանեսյանը պատասխանեց․ «Մի քանի օր առաջ Թագուհի Ղազարյանի հետ հարցազրույցի էինք եւ քննարկում էինք, այնտեղ քննարկման ժամանակ միտք ծագեց։ Քանի որ երգելու կամ նվագելու շնորհք չունեմ, քննարկեցինք, որ ինչո՞ւ ոչ, պարի մի համար դնել։ Իմ նախաձեռնությունն էր, մեր երիտասարդները սիրով միացան, եւ միասին նման բան ենք նախաձեռնել։ Դուր եկա՞վ ձեզ, թե՞ ոնց»։
Հարցին՝ այդքան ժամանակ ունի՞՝ նման բաներով զբաղվելու համար, Ավանեսյանը պատասխանեց․ «Այո, եւ հաց եմ ուտում, եւ երեխաներիս հետ եմ հեռախոսով շփվում, այո, երբեմն պարում եմ էլ, դա անում եմ աշխատանքից դուրս, երեկոյան ժամերին։ Երկար, բարդ, ծանր աշխատանքի հետ մարդը պիտի ունենա նաեւ այլ հետաքրքրություններ՝ գիրք կարդա, պարի, երգի, շփվի, որպեսզի կարողանան իր հոգեկան առողջությունը պահպանել։ Նախարարն աշխատում է աշխատանքային ժամերից շատ երկար, եւ, այո, ունի նաեւ կյանք»։
Կարդացեք նաև
Նախարարն ասաց, որ հետագայում այլ ոլորտներում իրեն դրսեւորելու հնարավորություն կունենա․ «Բայց դա 2026 թվականին չի լինի, որովհետեւ 2026-ին Քաղաքացիական պայմանագիրն իր իրականացրած քաղաքականության եւ ժողովրդին տրված խոստումներն իրացնելու փաստով վստահաբար հաղթանակ է տանելու։ Եվ ես դեռ քաղաքական գործունեությամբ եմ զբաղվելու»։
Ռոզա ՀՈՎՀԱՆՆԻՍՅԱՆ
