Ջրվեժում գտնվող «Palladium Hall»-ում այսօր երեկոյան կկայանա Նիկոլ Փաշինյանի նախաձեռնած «Վարչաբենդի» փարթին, որտեղ թմբկահարը Նիկոլ Փաշինյանն է լինելու: Հոլովակներից մեկում էլ նշմարվում է, որ պարողների մեջ է առողջապահության նախարար Անահիտ Ավանեսյանը:
Փաշինյանն արդեն քանիցս «անոնսել» է միջոցառման մասին, եւ տեսահոլովակներից մեկում երեւում է, թե ինչպես է նրան ողջունում «Դոմինո պրոդաքշընի» սեփականատեր Աշոտ Առաքելյանը:
Իշխանական միջոցառման կազմակերպիչը կրկին «Դոմինո պրոդաքշընն» է, որի սեփականատեր Աշոտ Առաքելյանը Փաշինյանի աշխատակազմի ղեկավար Արայիկ Հարությունյանի մտերիմներից է, ինչի հաշվին էլ նրան բաժին են հասնում բոլոր «յուղոտ» միջոցառումները՝ «Մեր ժամանակների հերոսը», լուսային դրոններով շոուն՝ Հանրապետության հրապարակում, Դիջիթեք Էքսպո-2025-ի շրջանակներում Երեւանի քաղաքապետարանի տաղավարի պատրաստումը եւ այլն: Նրա ընկերությունը 2018-ից կառավարական ճոխ պատվերներ է ստանում:
Կարդացեք նաև
Նշենք, որ Աշոտ Առաքելյանը ժամանակին արժանանում էր նաեւ «նախկինների» շնորհներին, մասնավորապես Գագիկ Բեգլարյանի քաղաքապետ եղած տարիներին նա ղեկավարում էր քաղաքապետարանի լրատվական բլոկը: Աշոտ Առաքելյանը հայտնի է նաեւ նրանով, որ նրա «Պրոքսի» կոչվող նրա ընկերությունն էր «Շարմի» հետ միասին նախագահական ընտրությունների ժամամանակ նկարում ՀՀԿ-ի քարոզչական՝ «Առաջ Հայաստան» հոլովակները, որոնց չմոնտաժված կտորները հետո տարածվեցին համացանցում, որտեղ հանրային հայտնի դեմքերը անհաջող արտահայտություններ էին անում ՀՀ նախագահի եւ քաղաքապետ Զախարյանի հասցեին: Անգամ Աշոտ Առաքելյանը չմոնտաժված կադրերի հանրայնացվելու հետ կապված խնդիրներ ունեցավ իրավապահների հետ:
Aravot.am-ը փորձեց կապվել Աշոտ Առաքելյանի հետ՝ իրեն վստահված «Վարչաբենդի» փարթիի վերաբերյալ մեկնաբանություն ստանալու համար: Հեռախոսազանգին պատասխանեց «Դոմինո պրոդաքշընի» աշխատակից Լուսինեն՝ ասելով, որ Աշոտ Առաքելյանը զբաղված է, գործերով դուրս է եկել եւ նրա հետ հնարավոր կլինի կապվել միայն երկուշաբթի օրը, իսկ ինքն իրավասու չէ այլ մանրամասներ հայտնելու:
Գոհար ՀԱԿՈԲՅԱՆ
էս խեղկատակին նայեք, տարածաշրջանը փոթորկվում է, վտանգները շատանում են, ալիևը շարունակում է զենք կուտակել, սրան վախեցնելով միջանցք է բացել տալիս, իսկ սա գեստապոյականների ցիլինդրը դրած գնում է թմբուկ խփելու փարթի անի։ Օր-օրի ավելի թեթևսոլիկ բաներ է անում ու թշնամիներին մեզ վրա ծիծաղեցնում։