2026թ․ փետրվարի 1ին Երևանում կայացավ «Բոլորին դեմ եմ» շարժման ինքնալուծարվող կուսակցության հիմնադիր համագումարը, որին մասնակցում էին շուրջ 500 քաղաքացիներ՝ Երևանից և ՀՀ տարբեր մարզերից։
Համագումարին մասնակցեցին շարժման անդամներ, քաղաքացիական նախաձեռնությունների ներկայացուցիչներ, ինչպես նաև տարբեր հյուրեր։ Համագումարի ընթացքում շարժման հիմնադիրների կողմից պաշտոնապես հիմնադրվեց «Բոլորին դեմ եմ» ինքնալուծարվող կուսակցությունը։
Համագումարի ընթացքում ներկայացվեց շարժման նպատակը և քաղաքական օրակարգը, անդամակցության և հանրային ներգրավման մեխանիզմները, ընտրական համակարգի բարեփոխմանն ուղղված օրենսդրական փոփոխությունների փաթեթը և դրանց իրականացման քայլերը, ինչպես նաև ընտրողների մասնակցության խթանմանը միտված առաջնահերթությունը:
Շարժումը հրապարակեց ընտրական համակարգի բարեփոխման հստակ ճանապարհային քարտեզ՝ ընդգծելով 3 առանցքային օրենսդրական փոփոխություն․
Կարդացեք նաև
• Կայուն մեծամասնության չեղարկում,
• 1% անցողիկ շեմի սահմանում,
• «Բոլորին դեմ եմ» քվեաթերթիկի ավելացում։
Շարժման ռազմավարությամբ նախատեսվում է մասնակցություն 2026 թվականի ընտրություններին և նշված օրակարգի շուրջ առավելագույնը 100-օրյա անցումային կառավարության ձևավորում։ Այդ ընթացքում նպատակ է դրված իրականացնել նշված օրենսդրական փոփոխությունները, որից հետո նշանակել արտահերթ ընտրություններ, չմասնակցել ընտրություններին, ապահովելով ընտրություններ առանց վարչական ռեսուրսի չարաշահման, և լուծարել կուսակցությունը։
Համագումարի արդյունքում Բոլորին դեմ եմ շարժման ինքնալուծարվող կուսակցության հիմնադիր անդամները բաց քվեարկությամբ որոշեցին հիմնել «Բոլորին դեմ եմ» ժողովրդավարական կուսակցությունը, հաստատեցին կանոնադրությունն ու ծրագիրը, ինչպես նաև ընտրեցին ղեկավար մարմիններ: Համագումարի ավարտին տեղի ունեցավ հարցուպատասխան շարժման անդամների և համակիրների հետ:
Բոլորին դեմ եմ
