-Նախորդ դատական նիստում մեղադրողը չի կատարել դատավորի պահանջը: Իմ պաշտպանը ներկայացրեց որպես խնդրանք, դուք ասացիք ՝ պահանջ, որը շատ ճիշտ է: Արձանագրում ենք, որ այս պահանջը չի կատարվել: Սա նաեւ ինչ-որ իմաստով դուռ է բացում, որ նախագահող դատավորի որեւէ պահանջ այս դատարանում չկատարվի՝ լինի մեղադրող կողմից, լինի պաշտպանների, թե հանիրավի զրպարտվածներիս կողմից,- այսօր առաջին ատյանի ընդհանուր իրավասության դատարանում դատավոր Կարեն Ֆարխոյանի նախագահությամբ ընթացող դատական նիստում հայտարարեց Բագրատ սրբազանը:
-Այսօր ամոթի ու խայտառակության մասին եմ խոսելու: Բաքվի դատարանում Արցախի հանրապետության ռազմաքաղաքական ղեկավարությունը ցմահ ազատազրկման է դատապարտվել: Ամո՛թ ամբողջ հասարակական, քաղաքական ու պետական մտքին, որոնք աջակից են եղել այս գործընթացին: Մեր եղբայրներին երկարատեւ տանջանքից հետո ցմահ են դատապարտել բանտարկության, որը պարզապես առաջին հերթին ուղղված է հավաքական մեր գոյությանը: Բաքվի բանտում տեղի ունեցած այդ վերդիկտ կոչվածը դրված է մեր դատական գործընթացի բոլոր դատավորների, քննիչների, մեղադրողների, հրահանգ տվողների, Սաուդյան Արաբիայում կամ այլ տեղ վանդակներ ստացողների, ԵԽԽՎ-ում զրպարտողների պարանոցին: Ցավում եմ, որ մենք ապրում ենք գերության այս զազրելի ամոթի ու խայտառակության օրերը: Իմ պատիվն ու կենսագրությունն է գողացված:
Թշնամու բանտում եղբայրներիս բանտարկությունը բոլորիս բանտարկությունն է,- ասաց Բագրատ սրբազանը:
Կարդացեք նաև
Այս հայտարարությունից հետո դատարանը ընդմիջում հայտարարեց:
Ի դեպ, Բագրատ սրբազանի ողջ ելույթի ընթացքում նիստերի դահլիճում բողոքի ակցիա իրականացրեց Արցախի հերոս Դավիթ Առուշանյանի մայրը՝ Լիդա Առուշանյանը:
Արփինե ՍԻՄՈՆՅԱՆ
