Մայրաքաղաքի «Դինամո» մարզահամալիրում բռնցքամարտի Հայաստանի մեծահասակների, կանանց և երիտասարդների առաջնությունները հասել են եզրափակիչ փուլ, որտեղ մենամարտելու են հանրապետության չեմպիոնի կոչման և հավաքականներում տեղ զբաղեցնելու համար։
Aravot.am-ը կիսաեզրափակիչ մենամարտերի ժամանակ զրուցեց ազգային հավաքականի գլխավոր մարզիչ Ռուդոլֆ Մկրտչյանի հետ։
-Մի քանի օր հետևում եք ռինգում ծավալվող իրադարձություններին։ Ի՞նչ տպավորություն եք ստանում։
-Մենամարտերը դիտարժան են։ Ունենք խոստումնալից երիտասարդներ։ Այսօրվա արդյունքները շատ կարևոր են թե նրանց, թե փորձառուների համար, որովհետև վաղը որոշվելու է ազգային հավաքականի հիմնական կազմը։ Եվ, ինչպես տեսնում եք, բռնցքամարտիկները ջանք չեն խնայում եզրափակիչ փուլ մտնելու համար։
Կարդացեք նաև
-Նշեցիք, որ մենամարտերը դիտարժան են։ Իսկ վարպետության մասին ի՞նչ կասեք։
-Որակը բավարար է։ Երևում է, որ պայքարը շարունակող տղաները տանը լավ են պատրաստվել։ Իսկ ովքեր թերացել են, ժամանակից շուտ լքեցին առաջնությունը։ Ինձ թվում է, որ նույն բանը կշարունակվի նաև վաղը՝ եզրափակչում։ Ով ավելի լավ պատրաստ լինի, նա էլ կհաղթի։
-Դուք ձեզ մոտ երիտասարդ բռնցքամարտիկների անուններ նշե՞լ եք, որոնք արդեն այսօր կամ շատ մոտ ապագայում արժանի մրցակցություն ցույց կտան իրենց ավագ ընկերներին։
-Կան այդպիսի տղաներ, բայց եկեք առայժմ անուններ չտանք։
-Այսինքն, երիտասարդական հավաքականի մարզիչները լա՞վ կադրեր են մատակարարում ազգային հավաքականին։
-Իհարկե։ Անցած տարի ունեցել ենք Եվրոպայի երիտասարդների չորս մրցանակակիրներ։ Նրանցից մի քանիսը արդեն տեղափոխվել են մեծահասակների խումբ ու իրենց լավ կողմերով են դրսևորում։
-Այս տարվա համար ի՞նչ ծրագրեր կան։
-Տարին շատ հագեցած է լինելու։ Մեր հիմնական թիրախը սեպտեմբերին Բուլղարիայում կայանալիք Եվրոպայի առաջնությունն է։ Կա 23 տարեկանների Եվրոպայի առաջնություն, նաև՝ աշխարհի գավաթ, որը անցկացվելու է փուլերով։ Այնպես որ, անելիքների պակաս չունենք։
Աշոտ ՀԱԿՈԲՅԱՆ
