«ՀՀ-Ադրբեջան երկկողմ համագործակցության, ենթակառուցվածքների ապաշրջափակման արդյունքում ամենաանհանգստացող կողմը Վրաստանն է: Որովհետեւ Վրաստանի մենաշնորհը վերանալու է, բայց չի վերանալու Վրաստանի կարեւորությունն ընդհանրապես: Որովհետեւ այն ուղիները, որոնք գործում են այսօր Վրաստանում, այնպես չէ որ պակաս կարեւոր են լինելու,-այսօր Ժողովրդավարության եւ անվտանգության տարածաշրջանային կենտրոնի (ԺԱՏԿ) տարեկան համաժողովի ժամանակ ասաց «Ալիք մեդիա» լրատվամիջոցի հիմնադիր Արսեն Խառատյանը:
Նրա խոսքով՝ Հայաստանի եւ Ադրբեջանի համագործակցության արդյունքում փոխվելու է Հայաստանի կախվածությունը Վրաստանից. «Եթե դիտարկենք Թուրքիա- Հայաստան սահմանի հնարավոր բացումը, Թուրքիայի միջոցով մեր հնարավոր ապրանքների տեղափոխության հնարավորությունը, ինչ խոսք, սրանք փոփոխություն են բերելու: Այդ անհանգստությունները տեսնում ենք Վրաստանի կողմից նույնիսկ պաշտոնական մակարդակում, երբ Վրաստանի վարչապետից ենք լսում Զանգեզուրի միջանցք արտահայտությունը»:
Խառատյանը կարեւորեց նաեւ այս տարեսկզբին Ադրբեջանի ու ՀՀ ԱԳ նախարարությունների հրապարակած փաստաթուղթը TRIPP-ի շրջանակում. «Այստեղ առավել կարեւորն այն է, որ TRIPP-ի հաջողությունը ուղիղ կապվել է Ադրբեջան-ՀՀ ինստիտուցիոնալ խաղաղության եւ ՀՀ-Թուրքիա հարաբերությունների կարգավորման հետ: Ինչը ենթադրում է՝ ԱՄՆ-ը ուղիղ ստանձնում է հանձառություն նաեւ այս ուղղությամբ ազդելու Բաքվի եւ Անկարայի վրա»:
Արփինե ՍԻՄՈՆՅԱՆ
