Շիրակի թեմի առաջնորդ Միքայել արքեպիսկոպոս Աջապահյանին, որին այսօր «Իզմիրլյան» բժշկական կենտրոնից տեղափոխեցին Գյումրի՝ Շիրակի թեմի առաջնորդարան, որտեղ նա պետք է կրի տնային կալանքը, քանի որ բնակվում է այստեղ, գյումրեցիները դիմավորեցին ծափահարություններով, հոգեւոր երգերով, գրկախառնություններով։
Շիրակի հոգևորականներից բացի Սրբազանին դիմավորելու էր եկել գրեթե ողջ քաղաքը՝ գործարարներ, Գյումրու քաղաքային իշխանության ներկայացուցիչներ՝ քաղաքապետի պաշտոնակատար Ավետիս Առաքելյանի գլխավորությամբ։ Անգամ քաղաքի մուրացկաններն էին այնտեղ։
Միքայել Սրբազանը, մեքենայից դուրս գալով ու տեսնելով իր հոտին, լայն ժպտաց։ Հարցին՝ «ինչպե՞ս եք, Սրբազան», բարձր տրամադրությամբ պատասխանեց․ «Լավ եմ, լավ»։
Սուրբ Յոթ վերք եկեղեցու զանգերը սկսեցին հնչել, հավաքվածները բացականչում էին․ «Սրբազա՜ն, Սրբազա՜ն», մարդիկ գրկախառնվում էին, համբուրում նրա աջը, առողջություն ցանկանում։ Նրան հոգևոր երգերի ուղեկցությամբ մի կերպ թողեցին մտնի առաջնորդարան։
Կարդացեք նաև
«Սրբազան, ժողովուրդը ձեզ հետ է», բացականչում էին, ծափահարում՝ այսպիսով մեկ անգամ ևս ցույց տալով, որ համաձայն չեն հոգևոր առաջնորդին առաջադրված մեղադրանքի հետ:
Նունե ԱՐԵՎՇԱՏՅԱՆ
