ՀՀ-ի ամենախոշոր հարկատուն՝ «Մոբայլ Սենթր» խանութների ցանցը Աննա Հակոբյանի «Իմ քայլը» բարեգործական հիմնադրամին 2025 թվականին փոխանցել է 10 միլիոն դրամ։ Այս մասին«Փաստինֆո»-ն տեղեկանում է «Իմ քայլը» հիմնադրամից։
1000 խոշոր հարկատուների ցուցակում «Մոբայլ Սենթր Արթ» ՍՊԸ-ն առաջին տեղում է վճարած հարկերով։ Այս ընկերությունը Հայաստանում ամենամեծ բջջային հեռախոսների վաճառքով զբաղվող ամենամեծ ցանցն է։
Դեռևս 2019 թվականին տնտեսական մրցակցության պաշտպանության պետական հանձնաժողովը վարչական վարույթ էր նախաձեռնել «Մոբայլ Սենթր» խանութների ցանց ընկերության դեմ, քանի որ քաղաքացիներից դիմում-բողոք էր ստացել առ այն, որ ընկերությունը դրսևորում է անբարեխիղճ մրցակցություն, մասնավորապես ոչ հավաստի գովազդի միջոցով մոլորեցնում է սպառողներին:
Այս ՍՊԸ-ն, ի դեպ, կապվում է գործարար Սամվել Ալեքսանյանի ընտանիքի անդամների հետ։ Ընկերությունը հիմնադրվել է 2011 թվականին Սիսակ Մարկոսյանի կողմից, իսկ արդեն 2017-ի դեկտեմբերի 26-ին ընկերության 100% բաժնեմասի սեփականատեր է դարձել Արթուր Պետրոսյանը, որը համացանցում առկա տեղեկությունների համաձայն՝ Սամվել Ալեքսանյանի քրոջ որդին է։
2023-2024 թվականներին ՍՊ ընկերությունը նվիրատվություններ չէր փոխանցել Հակոբյանի հիմնադրամին։
