Կազմակերպութեամբ կաթոլիկ եկեղեցւոյ միջ-եկեղեցական յարաբերութեանց գրասենեակին, 31 Յունուարէն 7 Փետրուար 2026-ին, կայացաւ արեւելեան ուղղափառ եկեղեցիներու (ոչ-քաղկեդոնական) երիտասարդ հոգեւորականներու յատուկ կաթոլիկ եկեղեցւոյ ծանօթացման (Study Visit of Young Priests and Monks of oriental Orthodox Churches) 6-րդ տարուան ծրագիրը։
Օրհնութեամբ Ն.Ս.Օ.Տ.Տ Արամ Ա. Վեհափառ Հայրապետին, յիշեալ ծրագիրին իրենց մասնակցութիւնը բերին Մեծի Տանն Կիլիկիոյ Կաթողիկոսութեան երկու երիտասարդ հոգեւորականներ՝ Դպրեվանքի հսկիչ ու Մայր Տաճարի դպրապետ Հոգշ. Տ. Ազատ Աբղ. Ֆիլիքեան եւ Ամերիկայի Միացեալ Նահանգներու Արեւմտեան թեմէն՝ Սան Ֆրանսիսքոյի հոգեւոր հովիւ Արժն. Տ. Արցախ Քհնյ. Պատոյեան: Ծրագիրին մասնակցեցան հայ եկեղեցւոյ Նուիրապետական Աթոռներու հոգեւորականներ եւս։
Երիտասարդ հոգեւորականները առիթ ունեցան մօտէն ծանօթանալու Վատիկանի հովանիին տակ գործող զանազան բաժանմունքներու աշխատանքներուն եւ հանդիպում ունեցան անոնց պատասխանատուներուն հետ: Ծրագիրը նաեւ ընդգրկեց զանազան եկեղեցիներու, վանքերու, համալսարաններու եւ մատենադարաններու այցելութիւններ:
Կարդացեք նաև
Այս առիթով հոգեւորականները մասնակցեցան նաեւ Վատիկանի Սուրբ Պետրոս պապական տաճարին մէջ Տեառնընդառաջի տօնին առիթով մատուցուած Սուրբ Պատարագին, որ մատուցուեցաւ Նորին Սրբութիւն Լեւոն ԺԴ. Պապին ձեռամբ:
Այցելութեան օրակարգին մէջ յատուկ տեղ գրաւեց Պապին հետ հանդիպումը: Հանդիպման ընթացքին ան ողջունեց ներկայ հոգեւորականները։ Խօսելով արեւելեան ուղղափառ ոչ-քաղկեդոնական եկեղեցիներու եւ կաթոլիկ եկեղեցւոյ յարաբերութեանց մասին՝ ըսաւ, որ մեր բազմազանութիւնը միութեան սպառնալիք մը չէ, այլ պարգեւ մը Սուրբ Հոգիէն, որով կը հարստացնէ ընդհանրական եկեղեցին:
Հանդիպման աւարտին իւրաքանչիւր հոգեւորական առիթ ունեցաւ Պապին օրհնութիւնը ստանալու: Այս առիթով մեր Սուրբ Աթոռին ներկայացուցիչները Վեհափառ Հայրապետին եղբայրական ողջոյնները փոխանցեցին Պապին։
Նշենք նաեւ, որ Կիրակի, 1 Փետրուար 2026-ի առաւօտուն, Սուրբ Վլաս եկեղեցւոյ մէջ մատուցուեցաւ Սուրբ եւ Անմահ Պատարագ։ Քարոզեց եւ օրուան պատգամը փոխանցեց Ազատ Աբղ. Ֆիլիքեան։
