Առաջին նախագահ Լեւոն Տեր-Պետրոսյանն օրերս հայտարարել էր, որ պառակտված ընդդիմությանը միավորելու միակ կարող ուժը գործարար Սամվել Կարապետյանն է։ Այսօր «Առավոտ»-ը ՀԱԿ փոխնախագահ Լեւոն Զուրաբյանին հարցրեց՝ ՀԱԿ-ը կմիանա՞ Սամվել Կարապետյանին։
Զուրաբյանն ասաց, որ առաջին նախագահը հանդես է գալիս վերկուսակցական դիրքերից։ «Ինքը ստանձնել է Երրորդ Հանրապետության հիմնադրի դերը եւ փորձում է ապահովել ընդդիմության համախմբում, ինչը թույլ կտա հեռացնել Նիկոլ Փաշինյանին իշխանությունից։ Այս հանձնառությունն ինքը ստանձնել է։ Եթե դա իրեն հաջողվի, մենք միայն ուրախ կլինենք, որովհետեւ ընդդիմության համախմբումը կարեւորագույն առաքելություն է, որպեսզի մենք լուծենք հանրապետության առաջ ծառացած այս ահավոր մարտահրավերները եւ այս ղեկավարությունից ազատվենք»,- ասաց նա։
Ըստ Զուրաբյանի՝ ՀԱԿ-ն ունի իր ասելիքն ու ծրագիրը, ձեւակերպել են իրենց ընտրարշավի կառույցները։ «Մենք շարունակելու ենք այդ գործը, եթե առաջին նախագահի ջանքերը պսակվեն հաջողությամբ, այդ դեպքում միասնաբար կպայքարենք, շատ լավ է։ Եթե չստացվի, այդ դեպքում միեւնույն է, մենք մեր պայքարից չենք հրաժարվում, որովհետեւ մենք ունենք մեր պատկերացումները, թե ինչպես պետք է կառավարվի Հայաստանն ապագայում»,- հավելեց նա։
Մանրամասները՝ տեսանյութում
Կարդացեք նաև
Հարցին, թե արդեն հանդիպումներ ու քննարկումներ կա՞ն ընդդիմության համախմբման հարցով, Զուրաբյանը պատասխանեց․ «Հանդիպումներ միշտ էլ ունեցել ենք, խոսել ենք, ամեն ինչ ընթացքի մեջ է»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
