Կարեն Ջալավյանը՝ «Քյոխը», դատի է տվել իշխանական բլոգեր Ռոման Բաղդասարյանին։ «Փաստինֆո»-ի հաղորդմամբ՝ Ջալավյանը հայցադիմում է ներկայացրել Երևանի ընդհանուր իրավասության քաղաքացիական դատարան՝ պահանջելով դատարանից պարտավորեցնել Բաղդասարյանին՝ հերքել վերջինիս հայտարարությունները։
Բաղդասարյանը, մասնավորապես, փետրվարի 5-ին հայտարարել էր, թե Կարեն Ջալավյանը՝ Քյոխը, իբրև «գողացել է զինվորներից սնունդը և նրանց առանց ջրի պահել, «Եղնիկներ»-ում ծաղրել և նվաստացրել է մեր զինվորներին, սովի է մատնել, ինչպես նաև Քյոխը մարդ է, որը միշտ ատել է Հայաստանից եկած զինվորներին»։ Այս հայտարարությունները, Ջալավյանի դիտարկմամբ, բացահայտ սուտ են և չեն համապատասխանում իրականությանը, ուստի, Ջալավյանը դատական կարգով հերքում է պահանջում Բաղդասարյանից, ինչպես նաև 500,000 դրամի չափով փոխհատուցում։
Հայցադիմումը մակագրվել է դատավոր Թաթուլ Ղուկասյանին։ Դեռևս առկա չէ տեղեկություն՝ այն վարույթ ընդունելու վերաբերյալ։
Նշենք, որ վերջին ամիսներին սա Բաղդասարյանի դեմ արդեն վեցերորդ հայցադիմումն է։ Նախորդ հինգ հայցերը ներկայացվել են գործարար, բարերար Սամվել Կարապետյանի կողմից, որը ևս հերքում էր պահանջում Բաղդասարյանից՝ վերջինիս կողմից զրպարտչական հայտարարությունների առնչությամբ։
Կարդացեք նաև
Իզաբել Սահակյան
