«Հիշեցնեմ՝ Դիանա Գասպարյանն այն ՔՊ-ականն էր, որը Սուրեն Պապիկյանին առաջարկում էր խոսել Նիկոլ Փաշինյանի հետ՝ հորդորելով հրաժարական տալ։ Միգուցե Ձեր հարցի պատասխանը շատ ավելի պարզ էր»,- դիմելով պատգամավոր Թագուհի Թովմասյանին, որը հարց էր տվել Հակակոռուպցիոն կոմիտեի նախագահ Արթուր Նահապետյանին ու պատասխան չէր ստացել, ասաց «Հայաստան» խմբակցության պատգամավոր Արթուր Խաչատրյանը։
Այնուհետև ինքը հարցրեց․ «Նշեցիք, որ 298 պաշտոնատար անձի գործ ուղարկել եք դատարան, տեղյա՞կ եք՝ քանիսի՞ վերաբերյալ է մեղադրական վերդիկտ կայացվել»։
Արթուր Նահապետյանը պատասխանեց․ «2025-ի գործունեության հաշվետվության մեջ չեն ներառվել նախկին տարիներին դատարան ուղարկված քրեական վարույթներով կայացված մեղադրական ակտերը։ Հակակոռուպցիոն կոմիտեն այս մասով հատուկ հաշվարկ չի իրականացնում, դա իրականացվում է դատական դեպարտամենտում»։
Կարդացեք նաև
Արթուր Խաչատրյանն արձագանքեց․ «Եթե 2025-ինը չունենք, 2024-ինն ասեք։ Բա Ձեզ չի հետաքրքրո՞ւմ՝ ձեր ուղարկած գործերից քանիսն է փլվել դատարանում, քանիսը՝ մեղադրական վերդիկտով վերջացել։ Հակառակ դեպքում երեկ այստեղ դատախազության վակխանալիա էր տիրում՝ վայ, Լևոն Մկրտչյանից այսքան փող են պահանջում՝ ներառյալ իր եղբորը պատկանող գինու գործարանի փողը, որի հողի վրա գինու գործարանը խաղող է աճեցնում։ Դրա համար, եթե ունեք այդ տեղեկությունը, ներկայացրեք, հետևաբար ինձ մոտ տպավորություն է առաջանում՝ ուղարկեցիք դատարան, դրեցիք արխիվ, մոռացվեց գնաց»։
ԱԺ քառօրյա նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
