«Պատահական չէ, որ այս ընտրությունների տարում իշխանությունը պետք է գործադրի իր ողջ գործիքակազմը, որ շարունակի մեղադրել նախկիններին, իսկ իրենք իբրև մաքուր ձեռքերով իշխանություն են, ոչ մի բանի մասին տեղեկություն չունեն և ապշահար լսում ու սկսում են դատապարտել նախկինների կատարած հանցագործությունները»,- ԱԺ նիստի ժամանակ հայտարարեց «Հայաստան» խմբակցության պատգամավոր Արծվիկ Մինասյանը՝ անդրադառնալով ՔՊ-ականների քննադատություններին և իրենց խմբակցությունն անընդհատ «Քոչարյանի ֆրակցիա» կոչելուն։
Ըստ Արծվիկ Մինասյանի՝ այս իշխանությունը, որն ութ տարի է պաշտոնավարում է, ազգային պետական մակարդակով որևէ դրական, շոշափելի արդյունք ցույց չի տվել, բայց տեմպով փորձում է նախկիններին հետևողականորեն վերագրել դարի հանցագործությունները․ «Դաստիարակությունից դուրս բառապաշար էլ են օգտագործում, ինչն անթույլատրելի է․ էլ գող, էլ ավազակ, ինչ բառեր ասես, որ չեն օգտագործում, և սա էն դեպքում, երբ նշված դեպքերի վերաբերյալ ոչ միայն ոչ մի դատական ակտ չկա, այլև ապացույցների 80-90 տոկոսը հետագայում պարզվում է՝ առնչություն չունի նկարագրված դեպքերի հետ։ Բայց կարևորն էս պահին հնչեցնելն է անուն։ Նստած էնտեղից հայտարարում են՝ Ռոբերտ Քոչարյանի ֆրակցիա և այլն։ Նիկոլ Փաշինյանի ֆրակցիա, է, հետո՞, ձեզ, եթե դուր է գալիս խմբակցության անձնավորումը, նշանակում է՝ դուք արհամարհում եք ընտրողներին»։
Կարդացեք նաև
Ազգային ժողովի նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
