«Սադրողը Դուք եք, մենք պատգամավորներ ենք, որոնք ձեզ հարցեր են տալիս և որոնց պարտավոր եք պատասխանել»,- կառավարության հետ հարցուպատասխանի ժամանակ ՀՀ վարչապետ Նիկոլ Փաշինյանի՝ Գառնիկ Դանիելյանին ուղղված որակումներին այդպես արձագանքեց «Հայաստան» խմբակցության պատգամավոր Ագնեսա Խամոյանը։
Իրանում ընթացող պատերազմի մասին հարց ձևակերպելուց առաջ ներկայացրեց ՀՀ արտաքին հետախուզության ծառայության զեկույցը, որում նշված է, որ Իրանում անկայունության աճն էլ ավելի կընդլայնի ՀՀ-ի ռիսկերը․ «Սա ոչ Կրեմլի «ագենտների», ոչ հիբրիդային պատերազմի հեղինակների, ոչ էլ ընդդիմադիր քաղաքական գործիչների խոսքն է։ Սա Ձեր կողմից ստեղծված արտաքին հետախուզական ծառայության 2026-ի զեկույցն է։ Մի հետախուզություն, որը գովերգել եք։ Ինձ հետաքրքիր է՝ որքա՞ն անլուրջ եք մոտեցել արտաքին հետախուզության ծառայության՝ այս զեկույցին, որ Իրան-Իսրայել-ԱՄՆ պատերազմի առաջին օրը անհոգ պեռաշկի էիք ուտում քարոզարշավային ավտոբուսում»։
Նիկոլ Փաշինյանն արձագանքեց․ «Ձեր հարցը ծայրից ծայր այն մասին է, որ ՀՀ-ում կան ինստիտուտներ, որ անկախ նրանից՝ ՀՀ վարչապետն ինչով է զբաղված, հոգ է տարել, որ այդ ինստիտուտները աշխատեն։ Իհարկե, ցավում ենք Իրանում և դրա շուրջ տեղի ունեցող իրադարձությունների մասին։ Ձեր հարցի համատեքստում անհասկանալի է՝ ինչի՞ ԱԺ նիստը չենք չեղարկել ընդհանրապես։ Ու որ ինձ ասում եք՝ ինչի ենք պեռաշկի ուտում, ձեզնից չի երևում, որ հացադուլ հայտարարած և քուրձ հագած վիճակում եք, ինչի՞ գլխներիդ մոխիր լցրած չի կամ ինչի՞ չեք ինքնահրկիզվում․․․ Իմիջիայլոց պեռաշկու տեղը կարող ենք ասել»։
Կարդացեք նաև
Ագնեսա Խամոյանն արձագանքեց․ «Բոլորը «պեռաշկի» էլ են ուտում, հաց էլ են ուտում, ջուր էլ են խմում, բայց երբ ձեր արտաքին հետախուզության ծառայությունը կանխատեսում է, որ Իրանում անկայունությունների աճն էլ ավելի կընդլայնի ՀՀ անվտանգային ռիսկերը, և ասում եք՝ զեկույցներ են, հազար հատ տենց զեկույց է լինում։ Այդ պայմաններում դուք պատերազմի առաջին օրը երբ պեռաշկի եք ուտում, դա նշանակում է, թե Դուք ինչ ազդակ եք ուզում տալ ՀՀ քաղաքացիներին։ Երբ Դուք անհոգ պեռաշկի եք ուտում, դա խորհրդանշական է, դա ոչ թե անվտանգության ցուցիչն է, այլ Ձեր՝ ոչ ադեկվատության ցուցիչը։ Ձեզ բացառապես Ձեր աթոռի պաշտպանությունն է հետաքրքրում ու դրա համար Դուք ամեն ինչ կանեք»։
Կառավարության հետ հարցուպատասխանն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
