Կառավարության շենքի առջեւ ակցիայի մասնակիցները նաեւ կարտոֆիլ եւ մակարոնեղեն էին բերել իրենց հետ։ «Համահայկական ճակատ» շարժման անդամ Ռուզան Ստեփանյանը մեկնաբանեց դրա խորհուրդը։ «Սա մեր կենսաթոշակառուների եւ բազմաթիվ բնակիչների սպառողական զամբյուղն է։ Եթե ուշադիր լինեք, կտեսնեք, որ խանութներում ամենաշատ սպառվող մթերքն է կարտոֆիլը եւ մակարոնը։ Սա այն զամբյուղն է, որով այսօր ապրում է Հայաստանի 21 տոկոս աղքատ բնակչությունը, 630 հազար կենսաթոշակառուները»,-ասաց նա։
Դիտարկմանը, թե Նիկոլ Փաշինյանը հիմա էլ հայտարարում է, թե թոշակառուն սովից չպետք է մեռնի, տիկին Ստեփանյանն ասաց. «Դրա համար եմ ասում, հիմա՝ ընտրություններից երկու ամիս առա՞ջ տեսան, որ թոշակառուն սոված է։ Թոշակառուները դեկտեմբեր, հունվար, փետրվար ամիսներին բառի ուղիղ իմաստով ցրտահարվել են իրենց տներում։ Ես տասնյակների գիտեմ։ Դրա համար եմ ասում, որ այստեղ ենք՝ կանգնելու մեր տատիկ-պապիկների արժանապատվության կողքին, թույլ չենք տա, որ մեր տատիկ-պապիկների արժանապատվությունը դառնա նախընտրական փող, դառնա նախընտրական թոշակ, դառնա նախընտրական նվեր»։
Աշոտ ՀԱԿՈԲՅԱՆ
