Մամուլում հրապարակված տեղեկությունների համաձայն, Հայոց ցեղասպանության թանգարան-ինստիտուտ հիմնադրամի տնօրեն Էդիտա Գզոյանին (լուսանկարում) ԿԳՄՍ նախարար Ժաննա Անդրեասյանը հորդորել է աշխատանքից ազատման դիմում գրել, անգամ սպառնացել է՝ եթե ինքնակամ չգրի, կազատեն աշխատանքից։
Aravot.am-ը փորձեց թեմայի վերաբերյալ մեկնաբանություն ստանալ տիկին Գզոյանից, որը սովորաբար պատասխանում է բոլոր՝ անգամ անծանոթ հեռախոսազանգերին, նաեւ չի անտեսում ֆեյսբուքով լրագրողների՝ իրեն ուղղված նամակները: Այս անգամ Հայոց ցեղասպանության թանգարան-ինստիտուտ հիմնադրամի տնօրենը անպատասխան թողեց մեր զանգերը եւ չարձագանքեց ֆեյսբուքյան նամակին:
Թանգարան-ինստիտուտի մամուլի ծառայությունից հետաքրքրվեցինք՝ իսկապե՞ս Ժաննա Անդրեասյանը Գզոյանին հորդորել է աշխատանքից ազատման դիմում գրել: Ի պատասխան ասացին, որ գրավոր հարցում ուղարկենք, մինչդեռ գրավոր հարցման անհրաժեշտություն չկար, որպեսզի 5-օրյա ժամկետում պատասխանեին, մենք ընդամենը պարզաբանում էինք ակնկալում:
ԿԳՄՍ նախարարությունից եւս փորձեցին պարզաբանում ստանալ՝ արդյոք ԿԳՄՍ նախարարը Գզոյանին հորդորել է աշխատանքից ազատման դիմում գրել, նախարարությունը նման դիմում ստացե՞լ է: Նախարարի մամուլի քարտուղար Նելլի Վահանյանը եւս հորդորեց գրավոր հարցում ուղարկել, մինչդեռ մեր պարագայում տեղեկատվության հարցում չէր, այլ ընդամենը մեկնաբանություն, պարզաբանում էինք ակնկալում:
Կարդացեք նաև
Հիշեցնենք, որ Տեղեկատվության ազատության մասին օրենքը նախատեսում է բանավոր հարցման իրավունք, եւ նման հարցման դեպքում, եթե դա համապատասխանում է օրենքին, իսկ դրա մեջ են նաեւ հանրային կարեւորության հարցերը, պատասխանը պետք է պետական մարմնի ներկայացուցիչն անհապաղ տրամադրի:
Ընդհանրապես, ԿԳՄՍ նախարար Ժաննա Անդրեասյանի պաշտոնավարման շրջանում այդ գերատեսչությունից տեղեկատվություն, հարցում, պարզաբանում, մեկնաբանություն ստանալը բարդացել է, անգամ գրավոր հարցման դեպքում, երբ ընդամենը «այո» կամ «ոչ» պատասխան պետք է տան, պատասխանը տրվում է ոչ լիարժեք կամ ընդհանրական, ինչը չէինք հետապնդել մեր հարցմամբ:
Ի վերջո, Էդիտա Գզոյանի աշխատանքից ազատման մասին տեղեկությունը չի դասվում պետական կամ ծառայողական գաղտնիքների շարքին, Հայաստանում էլ ռազմական դրություն հայտարարված չէ:
Գոհար ՀԱԿՈԲՅԱՆ
