«Քննարկումներն ընթացքի մեջ են, և մենք երկուշաբթի օրը այդ կապակցությամբ մամուլի ասուլիս ենք հրավիրել, որտեղ ավելի մանրամասն կխոսենք այդ մասին։ Մենք, որ կմասնակցենք ընտրություններին, դա հաստատ, բայց ինչ ձևաչափով, դեռ այդ գործընթացը ավարտված չի»,- իր գործով դատական նիստից առաջ լրագրողների հետ զրույցում ասաց ՀՀ ԱԺ անկախ պատգամավոր Հովիկ Աղազարյանը:
Դիտարկմանը՝ խոսակցություններ կան, որ հնարավոր է համագործակցեն «Լուսավոր Հայաստան»-ի հետ, Հովիկ Աղազարյանը պատասխանեց. «Լուսավոր Հայաստանը» կուսակցությունների առաջին շարքերում է գտնվում մեր՝ այսպես կոչված արժեհամակարգային հենքի իմաստով, որոնց հետ մենք մեծագույն հաճույքով կուզեինք, որ համագործակցեինք: Որոշում դեռ չկա»:
Ըստ Հովիկ Աղազարյանի՝ եթե ամեն ինչ գնա այնպես, ինչպես հիմա է, ապա «Քաղաքացիական պայմանագիր» կուսակցությունը կհավաքի 70% ձայն. «Ընդդիմությունը ճիշտ չի դիրքավորվում, մենք կասենք այն ճանապարհը, որով գնալու դեպքում «Քաղաքացիական պայմանագիրը» կհավաքի 37% ձայն»։
Կարդացեք նաև
Սամվել Կարապետյանի շուրջ ընդդիմության համախմբման առիթով էլ նշեց. «Եթե առաջին նախագահը ի նկատի ունի, որ ընդդիմությունը միանա Սամվել Կարապետյանին մեկ միասնական ցուցակի համատեքստում, ապա դա սխալ մոտեցում է, որովհետև իշխանությունները ցանկացած պահի այդ ուժին դուրս կմղեն քաղաքական պայքարից, ուղղակի այսպես կոչված ուժային որոշմամբ կամ իրավական ինչ-որ որոշմամբ, և հետևաբար ընդդիմադիր մի հսկայական ուժ չի հասնի ընտրությունների վերջնագծին։ Այդ մոտեցումը ճիշտ չի, մենք կառաջարկենք ուրիշ մոտեցում, որն ավելի ճկուն է»:
Հարցին՝ Իրանում պատերազմի ժամանակ իշխանությունները ներկուսակցական քարոզարշավ են անում, կարկանդակ են ուտում, դա ընդունելի՞ է, Հովիկ Աղազարյանը պատասխանեց. «Պետք է շատ զուսպ պահեին իրենց, գոնե ցույց տային, որ մի փոքր անհանգստացած են, ոչ թե ցույց տային, քանի որ ամեն ինչ օքեյ է, մենք կարկանդակ ենք ուտում, այնքան հանգիստ ենք: Սուրեն Պապիկյանը մի քանի օր առաջ հանդիպել էր Իրանի պաշտպանության նախարարի հետ, ով զոհվել էր, թեյ էր խմել հետը, գոնե մի քիչ ցույց տար, որ այն, ինչ տեղի է ունեցել, էն չի: Դա ինձ համար անընդունելի է»:
Դատական նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
