Սիրելի՛ գործընկերներ, ուղևորներ, երևանցիներ,
Այս տարի նշում ենք Կարեն Դեմիրճյանի անվան Երևանի մետրոպոլիտենի 45-ամյակը։ Սկզբում այն ստեղծվեց որպես ժամանակակից տրանսպորտային լուծում՝ քաղաքին նոր շունչ ու արագություն հաղորդելու համար։ Սակայն տարիների հոսքում մետրոն վերաճեց ավելինի․ դարձավ Երևանի առօրյայի անբաժանելի մասը, քաղաքի զարկերակը, որ ամեն օր կապում է քաղաքի տարբեր ծայրերը, տարբեր մարդկանց ու տարբեր պատմություններ։
Քառասունհինգ տարիների ընթացքում այն ձևավորվեց ոչ միայն որպես ուղևորափոխադրող համակարգ, այլ որպես վստահելի ուղեկից՝ սերունդների ճանապարհին։
Բաբկեն Սեդրակյան
Այս տարիների ընթացքում փոխվել են սերունդներ, փոխվել է քաղաքը, բայց անփոփոխ է մնացել մեկ կարևոր բան՝ մետրոյականների նվիրումն ու պատասխանատվությունն իրենց աշխատանքին: Ամեն օր, երբ առաջին գնացքը դուրս է գալիս գիծ, սկսվում է նոր պատմություն՝ լի հանդիպումներով, աշխատանքային ճանապարհներով, սպասումներով ու հույսերով։ Այդ ամենի հիմքում մեր աշխատակիցներն են՝ մեքենավարներ, հերթապահներ, ինժեներներ, սպասարկող անձնակազմ, ովքեր հաճախ անտեսանելի են մնում, բայց իրականում ապահովում են քաղաքի բնական ռիթմը։
Իմ առանձնահատուկ երախտագիտությունը մեր աշխատակիցներին։ Ձեր լուռ, ամենօրյա աշխատանքը վստահություն է ստեղծում հազարավոր ուղևորների համար։ Դուք եք այն մարդիկ, որոնց շնորհիվ մետրոն պարզապես տրանսպորտ չէ, այլ ապահով ու վստահելի միջավայր։
Կարդացեք նաև
Խորին շնորհակալություն եմ հայտնում մեր վետերաններին, ովքեր տարիներ առաջ հիմք դրեցին մետրոյի կայացմանն ու զարգացմանը։ Ձեր փորձը, ձեր պատասխանատվությունն ու հավատը ձևավորել են այն համակարգը, որի վրա այսօր մենք շարունակում ենք կառուցել ապագան։
Միևնույն ժամանակ, ցանկանում եմ շնորհակալություն հայտնել նաև ՀՀ կառավարությանն ու Երևանի քաղաքապետարանին՝ մետրոյի զարգացման ծրագրերին ցուցաբերվող շարունակական աջակցության և ֆինանսական ներդրումների համար։
Եվ իհարկե՝ շնորհակալություն մեր ուղևորներին։ Ձեր վստահությունն ու ընտրությունը մեզ պարտավորեցնում են լինել ավելի լավը, ավելի կազմակերպված և ավելի ժամանակակից։
45 տարին կարևոր հանգրվան է, բայց նաև նոր ճանապարհի սկիզբ։ Մենք շարունակելու ենք արդիականացնել մետրոպոլիտենի ենթակառուցվածքները, բարելավել ծառայությունների որակը և պահպանել այն արժեքները, որոնք ձևավորվել են տարիների ընթացքում։
Թող մետրոն շարունակի մնալ մեր քաղաքի վստահելի շարժը, այն վայրը, որտեղ ամեն օր հազարավոր մարդիկ մի պահ միավորվում են նույն ուղղությամբ շարժվելու համար։
Սրտանց շնորհավորում եմ բոլորիս 45-ամյակի առթիվ և շնորհակալություն եմ հայտնում յուրաքանչյուրիդ՝ այս ճանապարհը միասին անցնելու համար։
Բաբկեն ՍԵԴՐԱԿՅԱՆ
Կարեն Դեմիրճյանի անվան Երևանի մետրոպոլիտենի գլխավոր տնօրենի ժ/պ
