ՀԱԿ վարչության անդամ Արման Գալոյանի ֆեյսբուքյան գրառումը
Գարնանային ջերմ արևի տակ ինձ համար զբոսնում էի, ու հանկարծ մի մարդ մոտեցավ, թե՝ իմացե՞լ եք վերջին ցնցող նորությունը։
Մինչ կշտապեի հետաքրքրվել, թե ի՞նչ է պատահել, անծանոթս ավելացրեց. «Չէ, չեմ ասի, որքան էլ ստիպեք։ Չեմ ասի։ Դուք գնացեք ու ինքներդ իմացեք, թե ո՞վ էր Պանիկովսկին մինչեւ… չէ, այդ չէ, իմացեք, թե ո՞վ է քննելու մարտի 1-ի դեպքերով նախկին բարձրաստիճան ոստիկանների գործը»։ Ասաց, ու արագ հեռացավ։
Եւ այլ բան չէր մնում, քան միանգամից մտնել համացանց։ Եւ օ՜, զարմանք…. Պարզվեց…
Կարդացեք նաև
Այն, ինչ պարզվեց պարզապես սյուրռեալզիմի ժանրից էր։
Ճակատագրի հեգնանք…
Պարզվեց հայկական արդարադատության ողջ պերճանքն ու թշվառությունը…
Եւ ուրեմն, 2008թ. մարտի 1-ին «Ազատության» հրապարակի ցուցարարների նկատմամբ ոստիկանական բռնությունների գործը քննելու է ոչ այլ ոք, քան Երևանի քրեական դատարանի նախագահ, հայտնի դատավոր, արդարադատության ռահվիրա Մնացական Մարտիրոսյանը՝ նույն ինքը Մացոն։
Ի՞նչ տարօրինակ բան կա, կհարցնեք դուք.. մանավանդ, որ հիմա շատերն են մոռանում հեղափոխության հերոսներին…ՆԷՊ-ի շմոլք… չկա նախկին էնտուզիազմը….
Եւ ուրեմն, ի՞նչ տարօրինակ բան։
Առանձնապես ոչ մի։
Պարզապես, սրանից մոտ մեկ ու կես տասնամյակ առաջ նույն Մնացական Մարտիրոսյանը քննել է Մարտի 1-ի գործը, բայց՝ միանգամայն այլ տրամաբանության մեղադրանքով ու այլ մեղադրյալների նկատմամբ։
Նա քննել է 7-ի գործը, նա քննել է Նիկոլ Փաշինյանի գործը։ Ընդ որում, բոլոր գործերը եղել են շինծու՝ քաղաքական պատվեր ընդդիմության ներկայացուցիչների դեմ, ամբողջությամբ կառուցված կեղծ ցուցմունքների վրա։
Ու Մնացական Մարտիրոսյանն այդ գործով մեղադրյալներին դատապարտել է տարբեր տարիների ազատազրկման։
Բայց սա դեռ ամբողջը չէ. «Մարտի 1-ի» գործերով Մնացական Մարտիրոսյանի բոլոր դատավճիռները հետագայում բեկանվել են ՄԻԵԴ-ում, հռչակվել է հանիրավի դատապարտված անձանց անմեղությունը։ Ավելին, պետությունն էլ ստիպված է եղել այդ անձանց տասնյակ հազարավոր եվրոյի փոխհատուցում տրամադրել։
Եւ ահա հիմա, մեկ ու կես տասնամյակ անց նույն այս Մնացական Մարտիրոսյանը քննելու է մարտի 1-ի գործը միանգամայն հակառակ տրամաբանությամբ։ Քննելու և դատելու է հայտնի ոստիկաններ Ռոբերտ Մելքոնյանին, Վալերիյ Օսիպյանին ու Կարեն Մովսիսյանին, նաեւ՝ որոնց ցուցմունքների հիման վրա էր կայացրել իր նախկին՝ ՄԻԵԴ-ի կողմից ապօրինի ճանաչված դատավճիռները։
Ասեք, որ իսկական սյուրռեալիզմի ժանրից է սա… Լավ ֆիլմի սցենար։
Հ.Գ. Բայց այս նախկին բարձրաստիճան ոստիկանները կարող են հանգիստ լինել՝ իրենք չեն հայտնվի ճաղերի հետեւում, այս գործով վաղեմության բոլոր ժամկետներն անցել են, պարզապես՝ հիմա այս շոուն պետք է՝ ԱԺ ընտրություններին ընդառաջ նոր քաղաքական շոուների համար։
Հ.Հ.Գ. Այս տրամաբանությամբ, պետք է Մնացական Մարտիրոսյանի քննությանը հանձնել նաեւ մարտի 1-ի գործով Ռոբերտ Քոչարյանի ու նրա հետ դատվող մյուս նախկին բարձրաստիճան պաշտոնյաների քրեական գործն էլ։ ՉԷ՞ որ այսպես ավելի տրամաբանական է։
