«Այս դատավարությունների մասին միշտ ասել եմ՝ եթե ուզում ենք արագ լուծել խնդիրը, ապա լավագույնը քաղաքական, դիվանագիտական ճանապարհն է։ Դժբախտաբար, ինչպես բոլորդ գիտեք, իրական գործողություններ չեն ձեռնարկվում հայկական կառավարության կողմից հայ բանտարկյալների ազատ արձակումը պահանջելու համար։ Փաստացի սա դրամա է, ազգային ողբերգություն, որովհետև հայ բանտարկյալներին՝ որպես պատանդ Ադրբեջանում պահելը վիրավորանք է հայերի ազգային արժանապատվության հասցեին»,-հարցին՝ ի՞նչ է պետք անել, որպեսզի Ադրբեջանն ազատ արձակի հայ ռազմագերիների և ի՞նչ է լինելու նրանց ճակատագիրը, Երևանում կազմակերպված Հայաստանում Ժողովրդավարության Միջազգային Դիտարանը (IODA) մամուլի ասուլիսի ժամանակ այսպես պատասխանեց IODA հիմնադիր և համակարգող Ֆիլիպ Քալֆայանը։
Ասաց, որ այդ հարցն ուղղակիորեն իրենց առաքելության մանդատի շրջանակում չէ։
Նշենք, որ Դիտարանն ամփոփեց Հայաստանում խորհրդարանական ընտրություններին ընդառաջ ժողովրդավարական պայմանների դիտարկման և վերլուծության նպատակով իրականացվող փաստահավաք առաքելության առաջին փուլի արդյունքները։
Կարդացեք նաև
Շարունակելով Բաքվում հայ ռազմագերիների ճակատագրին առնչվող թեման՝ Ֆիլիպ Քալֆայանն ասաց․ «Ադրբեջանն ինքնիշխան պետություն է, մենք կարող ենք վիճարկել որոշումները, որ կայացվել են ադրբեջանական դատարանի կողմից։ Միայն մեկ տարբերակ կա՝ դիմելու Եվրոպական դատարան։ Դժբախտաբար, դա նշանակում է գործի քննության երկար ձգձգումներ»։
Մամուլի ասուլիսն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
