ՀՀ ֆինանսների նախարարությունում տեղի է ունեցել Հայաստան-ԵՄ Տնտեսական համագործակցության և այլ հարակից ոլորտների ենթակոմիտեի 5-րդ նիստը: Հայկական կողմից նիստը նախագահել է ֆինանսների նախարարի տեղակալ Էդգար Մկրտչյանը, իսկ ԵՄ կողմից բացման խոսքով հանդես է եկել Հայաստանում ԵՄ պատվիրակության ղեկավար, արտակարգ և լիազոր դեսպան Վասիլիս Մարագոսը: Նիստին մասնակցել են նաև ՀՀ Կառավարության, Կենտրոնական բանկի, Հաշվեքննիչ պալատի, Եվրոպական հանձնաժողովի և Հայաստանում ԵՄ պատվիրակության ներկայացուցիչներ։
🔹 Նիստի ընթացքում ներկայացվել են Հայաստանի մակրոտնտեսական վերջին զարգացումներն ու առկա իրավիճակը: Հայկական կողմը հանդես է եկել հանրային ֆինանսների կառավարման (ՀՖԿ) ոլորտում իրականացվող բարեփոխումների վերաբերյալ զեկույցով՝ անդրադառնալով, մասնավորապես, պետական պարտքի կառավարման, հանրային ներդրումների կառավարման և արտաքին աուդիտի բնագավառներում գրանցված առաջընթացին:
🔹 Կողմերը քննարկել են նաև ֆինանսական հատվածի զարգացումները, վիճակագրության ոլորտի բարելավումները և խարդախության դեմ պայքարում ԵՄ գործընկերների հետ համագործակցության հարցերը: Զուգահեռաբար, Եվրոպական հանձնաժողովի կողմից ներկայացվել են Հայաստանի համար ԵՄ «Դիմակայունության և աճի պլանի» ընթացքը, ինչպես նաև Եվրոպական միության տնտեսական վերջին զարգացումները:
ՀՀ ֆինանսների նախարարություն
