Առաջին ատյանի ընդհանուր իրավասության քրեական դատարանում դատավոր Մուշեղ Արամյանի նախագահությամբ, այսօր շարունակվում է Փարաքարի նախկին համայնքապետ Վալոդյա Գրիգորյանի սպանության գործով դատական նիստը: Դատարանը քննարկեց մեղադրյալ Նարեկ Օհանյանի պաշտպան Վահան Հովհաննիսյանի միջնորդությունը՝ գործին վերաբերելի կարեւոր փաստաթղթերը ստանալու վերաբերյալ:
-Երբ ծանոթացա քրեական վարույթի նյութերին, տեսա՝ որոշակի փաստաթղթեր նյութերի մեջ չկան, կան դրանց վկայակոչումները, բայց չկան փաստաթղթերը: Օրինակ՝ գաղտնի քննչական գործողությունների արդյունքները կրող սկավառակը, օրինակ` Նարեկ Օհանյանի նկատմամբ իրականացված բանկային գաղտնիք ստանալուն ուղղված գործողությունների արդյունքները,- թվարկեց պաշտպանը՝ նշելով եւս մեկ փորձաքննության եզրակացություն, որը եւս, ըստ նրա, վարույթի նյութերի հետ իրեն չի տրամադրվել:
Հովհաննիսյանի խոսքով՝ ժամանակին ինքը գրավոր միջնորդությամբ պահանջել է քննիչից, հսկող դատախազից, բայց մերժվել է:
-Վարույթ իրականացնող մարմինը ոչ դատավարական սկզբունքներով է առաջնորդվում՝ տղայական, մանկական, բայց ոչ դատավարական,- հավելեց պաշտպանը:
Կարդացեք նաև
Նիստը նախագահող դատավորը նկատեց, որ քննարկվում է արդեն մի քանի անգամ արծարծված թեմա, պաշտպանը պնդեց՝ իրավունքի վերականգնման միջնորդություն է:
Հանրային մեղադրողն էլ հայտնեց, որ քննիչը պաշտպան Հովհաննիսյանին հայտնել է, որ կարող է իր կրիչով գնալ վարույթ իրականացնող մարմին ու ներբեռնել ցանկացած ծավալի նյութ, իսկ պաշտպանն իր ծանրաբեռնվածությունից ելնելով՝ նպատակահարմար չի գտել գնալ ու ներբեռնել, հիմա էլ նույն միջնորդությունը ներկայացրել է դատարան:
-Այդ չարչրկված դիսկերը պետք է տրամադրվեին քրեական վարույթի նյութերի հետ: Ես չունեմ պարտականություն, գնամ դիսկերը քննիչի փոխարեն գցեմ իմ համակարգչի մեջ,- ասաց Հովհաննիսյանը:
-Անցյալում տեղի ունեցող գործողություն եք կրկնում, անընդհատ կրկնել մի բան, որն արդեն իսկ արժանացել է գնահատականի, դատարանի կողմից միջոցներ են ձեռնարկվել ու աջակցություն տրամադրվել, որ ստանաք այն, ինչ ցանկանում եք ստանալ, հիմա վերստին կրկնելը չի կարող դիտարկվել իրավաչափ,- արձագանքեց նիստը նախագահող դատավորը:
Նիստը նախագահողի արձագանքից հետո հարցի քննարկումը դադարեցվեց ու շարունակվեց ապացույցների հետազոտությունը:
Հիշեցնենք, որ գործով անցնում են՝ 20-ամյա Գևորգ Հարությունյանը և Նարեկ Օհանյանը: Վալոդյա Գրիգորյանը սպանվել էր 2025 թվականի սեպտեմբերի 23-ին Մերձավանի իր նորակառույց տան մոտ: Նրա հետ միասին սպանվել էր նաև քրեական ոստիկանության ծառայող Կարեն Աբրահամյանը։
Արփինե ՍԻՄՈՆՅԱՆ
