Առաջին ատյանի ընդհանուր իրավասության քրեական դատարանում դատավոր Մուշեղ Արամյանի նախագահությամբ, այսօր հետազոտվեց Փարաքարի նախկին համայնքապետ Վալոդյա Գրիգորյանի սպանության գործով մեղադրյալ Նարեկ Օհանյանի բջջային հեռախոսում առկա տեղեկատվությունը:
Նարեկ Օհանյանը խնդրեց անձնական լուսանկարները դռնփակ նիստով հետազոտել, դատարանը բավարարեց խնդրանքը: Իսկ ոչ անձնական լուսանկարների շարքում կային ինքնաձիգի եւ Փարաքարի սպանված համայնքապետ Վալոդյա Գրիգորյանի մի քանի լուսանկարներ, ընկերներով խմբակային լուսանկար, որտեղ կար գործով անցնող մյուս մեղադրյալ Գեւորգ Հարությունյանը:
Կարդացեք նաև
Օհանյանի պաշտպան Վահան Հովհաննիսյանն արձագանքեց՝ պարզաբանելով, որ բջջային հեռախոսում առկա տեղեկատվության հետազոտությունը ցույց տվեց, որ ոչ բաց, ոչ բջջային հավելվածներով Գեւորգ Հարությունյանի եւ Նարեկ Օհանյանի միջեւ կապ չի հաստատվել:
Անդրադառնալով ինքնաձիգի լուսանկարին՝ փաստաբանն ասաց, որ համապատասխան փուլում միջնորդել են, որ հետազոտվի այն հեռախոսը, որի հետազոտման պարագայում պարզ կդառնալ, որ նշված ինքնաձիգը Նարեկ Օհանյանի կողմից հեռախոս ներբեռնվել է փետրվարի 5-ին, այսինքն, երբ սպանության դեպքի հետ կապված Նարեկ Օհանյանը փորձել է ուսումնասիրել, թե սպանությունն ինչ հրազենով է կատարվել ու դա կապ չունի Կարեն Աբրահամյանի ու Վալոդյա Գրիգորյանի սպանության հետ:
Փաստաբանը վստահեցրեց, որ Վալոդյա Գրիգորյանի լուսանկարն էլ չի ներբեռնվել Նարեկ Օհանյանի կողմից հեռախոսի՝ իր տիրապետության տակ գտնվելու ընթացքում, այլ անձանց կողմից է կատարվել, երբ այդ հեռախոսը Օհանյանի տիրապետության ներքո չի եղել: Փաստաբանն ասաց՝ փորձաքննություն է միջնորդելու, որ նշանակվի այդ մասով: Փաստաբանը նաեւ շեշտեց, որ քննիչը բջջային հեռախոսի պարունակությունը հետազոտելիս ինքնաձիգն ու Վալոդյա Գրիգորյանի լուսանկարը կողքի կողքի է համադրել՝ տպավորություն ստեղծելով, որ դրանք իրար հետ կապ ունեն, մինչդեռ Նարեկի հեռախոսում այդպիսի լուսանկարների համադրություն չի եղել:
Հանրային մեղադրողը ճշգրտեց, որ Վալոդյա Գրիգորյանի լուսանկարը բբջային հեռախոս է ներբեռնվել դեպքից երկու օր առաջ:
Հիշեցնենք, որ գործով անցնում են՝ 20-ամյա Գևորգ Հարությունյանը և Նարեկ Օհանյանը: Վալոդյա Գրիգորյանը սպանվել էր 2025 թվականի սեպտեմբերի 23-ին Մերձավանի իր նորակառույց տան մոտ սպանվել է: Նրա հետ միասին սպանվել էր նաև քրեական ոստիկանության ծառայող Կարեն Աբրահամյանը։
Արփինե ՍԻՄՈՆՅԱՆ
