«Կառավարության վաղվա նիստում կընդունենք որոշում՝ երևանամերձ բնակավայրերում սերտիֆիկատների իրացման գնի փոփոխության վերաբերյալ»,- ԱԺ-կառավարություն հարցուպատասխանի ժամանակ ասաց աշխատանքի և սոցիալական հարցերի նախարար Արսեն Թորոսյանը՝ անդրադառնալով արցախցիների բնակապահովման ծրագրում կատարվող փոփոխություններին։ Կառավարության որոշմամբ երևանամերձ համայնքներում բնակարան գնելու համար մեկ անձի հաշվարկով կհատկացվի 4 մլն դրամ՝ նախկին 3 մլն-ի փոխարեն։
«Այսօրվա դրությամբ մենք ունենք տրամադրված 5217 սերտիֆիկատ և 2336 իրացված սերտիֆիկատ։ Այսինքն՝ 2336 ընտանիք արդեն ձեռք է բերել բնակարան, մնացածը ձեռքբերման փուլում են։ Եվ այս թվերն աճում են օրական կտրվածքով, ամենօրյա գործընթաց է»,- նշեց նա։
Արսեն Թորոսյանը մանրամասներ ներկայացրեց նաև արցախցիների համար իրականացվող ինքնազբաղվածության նոր ծրագրի վերաբերյալ, ասաց, որ երեկվա դրությամբ արդեն ստացվել է 76 հայտ։
Մանրամասները՝ տեսանյութում
Կարդացեք նաև
Անդրադառնալով արցախցիների այն բողոքներին, որ կառավարության անդամները միայն մեկ խումբ արցախցիների հետ են հանդիպում, մյուսների հետ խուսափում են հանդիպել, Արսեն Թորոսյանն ասաց․ «Եթե մեր որոշ հայրենակիցներ կարծում են, որ անձամբ իրենց հետ պետք է հանդիպենք, մենք նաև դրան ենք պատրաստ։ Եղել են հրապարակային հայտարարություններ, որ իրենք ուզում են հանդիպել մեզ, ասել ենք՝ դրա համար կա ընթացակարգ, խնդրեմ, եկեք հանդիպեք։ Բայց ստեղ ուրիշ ենթատեքստ կա, որ ինչ-որ պաշտոնական ներկայացուցիչների հետ են հանդիպում ուզում, որը մեր համար հասկանալի չէ, թե ինչ է նշանակում պաշտոնական ներկայացուցիչ։ Մեր բոլոր հայրենակիցները մեզ համար հավասար են, և բոլորի խնդիրները շատ կարևոր են»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
