Միջազգային և անվտանգային հարցերի ինստիտուտի հիմնադիր նախագահ Ստյոպա Սաֆարյանը ֆեյսբուքյան իր էջում գրում է.
«Երևանի առաջին ատյանի դատարանն արդարացրել է ՀՀ արտաքին գործերի նախարարության նախկին աշխատակից Աշխեն Ալեքսանյանին, որին պետական դավաճանության մեղադրանք էր ներկայացվել։ Անցած տարի հունիսի 20-ին ազգային անվտանգության ծառայությունից ստացված հաղորդման հիման վրա քննչական կոմիտեն քրեական վարույթ էր նախաձեռնել, որ ՀՀ արտաքին գործերի նախարարության աշխատակիցը սիրային կապի մեջ էր մտել Ադրբեջանի հատուկ ծառայության գործակալի հետ, այնուհետև հավաքագրվել էր և գաղտնի տեղեկատվություն փոխանցել Ադրբեջանին։
Աշխեն Ալեքսանյանին առաջադրվել էր մեղադրանք ՀՀ քրեական օրենսգրքի 418-րդ հոդվածի 1-ին մասով և 424-րդ հոդվածի 1-ին մասով, առերևույթ հանցանքների հատկանիշներով, այն է՝ ՀՀ արտաքին գործերի նախարարության աշխատակցի կողմից լրտեսության, օտարերկրյա պետության ներկայացուցչին պետական գաղտնիք պարունակող տեղեկություններին ծանոթանալու համար պայմաններ ստեղծելու, թշնամական գործունեություն իրականացնելու համար օգնություն ցույց տալու եղանակով պետական դավաճանություն կատարելը։
Հիմա հանրությունն ու ես ուզում ենք հասկանալ՝ Ազգային անվտանգության ծառայությունը զրպարտե՞լ է ԱԳՆ աշխատակցին, որ նա սիրային կապի մեջ էր մտել Ադրբեջանի հատուկ ծառայության գործակալի հետ, այնուհետև հավաքագրվել էր և գաղտնի տեղեկատվություն փոխանցել Ադրբեջանին, թե՞ նա միայն սիրային կապի մեջ էր մտել Ադրբեջանի հատուկ ծառայության գործակալի հետ, բայց չէր հավաքագրվել ու գաղտնի տեղեկատվություն չի փոխանցել Ադրբեջանին․․․ Թե՞ անկախ նրանից, որ նա սիրային կապի մեջ էր մտել Ադրբեջանի հատուկ ծառայության գործակալի հետ, այնուհետև հավաքագրվել էր և գաղտնի տեղեկատվություն փոխանցել Ադրբեջանին, միևնույն է՝ «այսպես է ճիշտը»․․․
Կարդացեք նաև
Սա ուղղակի անպատկերացնելի է ու վերջին շրջանի խոսույթների (հանուն խաղաղության գործընթացի Ադրբեջանին հաճոյանալ ամեն ինչում) համատեքստում լավ տեղ չի գտնվելու ո՛չ իշխանությանը, ո՛չ երկրին․․․»։
