Երեկ Սուրբ Աննա եկեղեցու բակից Նիկոլ Փաշինյանի մասնակցությամբ միջադեպով ձերբակալված անձանց նկատմամբ չկա քրեական հետապնդում, դեռեւս չկա առաջադրված մեղադրանք: Այս մասին Aravot.am-ին հայտնեց փաստաբան Վարդուհի Էլբակյանը:
«Երեխեքը որեւէ քաղաքական պատկանելություն չունեն, որեւէ կուսակցության անդամ չեն: Ոչ միայն երեխեքը, այլեւ ընտանիքի անդամները: Նրանք դպրոցական երեխեք են, առաջին դասարանից բացարձակ գերազանցիկ, ու երկուսն էլ ունեն որոշակի առողջական խնդիրներ: Ուղղակի հավատացյալներ են ու շատ հայրենասեր երեխեք»,- մեզ հետ զրույցում ասաց Վարդուհի Էլբակյանը:
Ի դեպ՝ դեռ երեկ միջադեպից հետո հայտնի դարձան դպրոցահասակ այդ տղաների՝ երկվորյակ եղբայրների անունները՝ Դավիթ ու Միքայել Մինասյաններ:
Ըստ փաստաբանի՝ եղբայրներից մեկին է վերագրվում Փաշինյանին հարվածելու փորձը, սակայն իրականում, ըստ փաստաբանի՝ հարվածելու փորձ չի էլ եղել. «Երեխային են հարվածել, դա իր անկանոն շարժումն է եղել, իրեն խփելու արձագանքը, որը որպես հարված փորձեցին ներկայացնել»:
Կարդացեք նաև
Փաստաբանը ենթադրում է, որ տղային ասել են այն կողմ գնա, հրմշտել են, ինչպես երեւում է տեսագրության կադրերում, նա էլ չի գնացել, դրա համար են հարվածել. «Երեխեքը ցուցմունք չեն տվել, այս ամենը ապօրինի ենք համարում, դրա համար այս պահին ձեռնպահ կմնանք հայտարարություն անելուց»:
Իսկ երրորդ ձերբակալվածը՝ Գեւորգ Գեւորգյանը, ըստ Վարդուհի Էլբակյանի, տղաներին մինչեւ միջադեպը չի էլ ճանաչել, պարզապես որպես պատարագի մասնակից դեպքի վայրում է եղել ու երբ նկատել է՝ դպրոցահասակ տղային խփում են, խփողի ձեռքը բռնել է ու հարցրել՝ ինչու եք խփում:
«Որեւէ առնչություն, որեւէ կապ, որեւէ հանգամանք իրենց իրար հետ չի կապում: Այս երեխեքին որեւէ կուսակցության կամ այլ մարդու հետ ոչինչ չի կապում»,- հավելեց Էլբակյանը:
Հիշեցնենք, որ Փաշինյանը երեկ միջադեպից հետո լրագրողների հետ զրույցում վստահեցրել էր, որ ոստիկանությունն իր պարտականությունները կատարելու համար լրացուցիչ հրահանգավորման կարիք չունի:
Արփինե ՍԻՄՈՆՅԱՆ
