Ռուսական ՏԱՍՍ-ին տված հարցազրույցում Ռուսաստանում Իրանի դեսպան Քազեմ Ջալալին ներկայացրել է Թեհրանի պահանջները ԱՄՆ-ի և Իսրայելի նկատմամբ՝ երկարատև խաղաղության հասնելու համար։ Ցանկը բաղկացած է չորս կետից։
1. «Ագրեսիայի և ահաբեկչական գործողությունների վերջնական և լիակատար դադարեցում։
2. Ագրեսիայի և պատերազմի կրկնությունը կանխելու համար օբյեկտիվ և հավաստի երաշխիքների տրամադրում։
3. Նյութական և բարոյական վնասի լրիվ փոխհատուցում։
Կարդացեք նաև
4. Հարգանք Հորմուզի նեղուցում Իրանի իրավական իրավասության նկատմամբ՝ միջազգային ծովային անվտանգությունը պաշտպանելու համար», – նշել է դիվանագետը։
«Բարձր գնահատելով միջնորդների դերն ու ջանքերը, մենք կարծում ենք, որ խաղաղությունը կախված է միայն այդ պարտավորությունների կատարումից», – ընդգծել է Ջալալին։
Նա հավելել է, որ Իրանի Իսլամական Հանրապետությունը միշտ ողջունել է տարածաշրջանում կայունություն և անվտանգություն հաստատելու ցանկացած կառուցողական և անկեղծ ջանք։
«Այնուամենայնիվ, պետք է ընդգծել, որ արդար խաղաղության և երկարատև հրադադարի հասնելու ցանկացած նախաձեռնություն կամ առաջարկվող ծրագիր պահանջում է տեղում առկա իրողությունների հաշվառում և այդ իրավական և քաղաքական պայմանների ու պահանջների կատարում», – ընդգծել է դիվանագիտական առաքելության ղեկավարը։
Ջալալին հայտարարել է, որ Իրանը կշարունակի իրացնել ինքնապաշտպանության իր անքակտելի իրավունքը մինչև սպառնալիքի աղբյուրի լիակատար վերացումը։
«Ինչ վերաբերում է գործընկերների հետ խորհրդակցություններին, Թեհրանն իր դիվանագիտական օրակարգում միշտ ներառում է կարծիքների փոխանակում ու համակարգում իր ռազմավարական դաշնակիցների, այդ թվում՝ Ռուսաստանի հետ», – հավելել է նա:
Թարգմանությունը՝ Radar.am-ի
