«Հարցի լուծում չտան, ընտրություններին չեմ էլ գնա»,-այսօր ՊՆ շենքի դիմաց վաղ առավոտից պարտադիր զինվորական ծառայություն անցնող զինծառայողների ծնողների բողոքի ակցիայի ժամանակ ասաց զինվորներից մեկի պապիկը:
Հիշեցնենք, որ ծնողները պահանջում են, որ բանակում ծառայող իրենց որդիների վրա նույնպես տարածվի 1.5 տարի զինծառայություն անցնելու դրույթը:
«Ընտրության չեմ գնալու, չեմ թողնելու ազգս գնա: Գնամ, որ ի՞նչ ընտրեմ: Անարդարություն է, իմ երեխեն ծառայի, մյուսի երեխեն չծառայի: Ծննդյան մի ամսվա տարբերությամբ ինչու երեխեքին 2 տարի պահեն բանակում: 2 տարի պահում են՝ ի՞նչ անեն երեխեքին: 1,5 տարին էլ է շատ-շատ: Մի տարին հերիք է երեխեքին, ամեն ինչ կարող են սովորեցնել էդ մի տարում: Էդ ի՞նչ են սովորեցնում, որ մի տարում չեն կարողանում սովորեցնել: Եթե այսպես շարունակվի, սաղին ասելու եմ՝ չգնաք ընտրության»,- հավելեց զինվորի պապիկը:
Ակցիայի մեկ այլ մասնակից էլ՝ Արմեն Բադալյանը, նկատեց, որ 2 տարին շատ է համարում զինվորական ծառայության համար. «Լավ կլիներ բոլորի վրա տարածվեր 1,5 տարին: Բացի այդ էլ ինստիտուտը հիմա կիսատ թողնում գնում են, 2 տարին շատ մեծ ժամանակ է: Մոռանում են՝ ինչի համար են հավաքվել: Ավելի լավ չի՞ զինվորական պատրաստականությունը ստանան, տղամարդ վերադառնան, մի տարին էլ է հերիք, կամ գոնե 1,5 տարի: Եթե հնարավոր է՝ ընդառաջեն բոլորին վերաբերվի 1,5 տարի ծառայությունը»:
Կարդացեք նաև
Հիշեցնենք, որ զինծառայության մասին օրենքի փոփոխություններով՝ նախատեսվել է պարտադիր զինվորական ծառայության ժամկետի կրճատում՝ 24 ամսից մինչեւ 18 ամիս՝ սկսած 2025 թվականի ձմեռային զորակոչից, սակայն այդ փոփոխությունները չեն տարածվում արդեն ծառայության մեջ գտնվող զինծառայողների վրա։
Արփինե ՍԻՄՈՆՅԱՆ
