«Հայաստանի այս վարչակազմը երեք տարի մերժել է հադրութցիներին ու շուշեցիներին փախստականի կարգավիճակ տալը՝ պնդելով, որ նրանք ՀՀ քաղաքացի են»- Արցախի հանրային խորհրդի կազմակերպած արցախցիների նկատմամբ ատելության խոսքի եւ խտրական վերաբերմունքի դրսեւորումների թեմայով պանելային քննարկման ժամանակ ասաց իրավապաշտպան Լարիսա Ալավերդյանը։
Նրա խոսքով՝ ՀՀ Սահմանադրության համաձայն՝ ՀՀ քաղաքացին որտեղ էլ լինի, ՀՀ-ն պարտավոր է նրան պաշտպանել։ «Եվ այդ քարտեզը, այդ տարածքը, որը ցույց է տալիս Նիկոլ Փաշինյանը, խոսում է իր գրագիտության պակասի մասին՝ քաղաքացուն պաշտպանելը կապ չունի տարածքի հետ»,- ասաց նա։ Լարիսա Ալավերդյանի խոսքով՝ կառավարության՝ արցախցիներին փախստականի կարգավիճակ տալու որոշման մեջ 070 անձնագրերի վավեր չլինելու մասին որեւէ հիշատակում չկա, դա զուտ գործադիր իշխանության ինքնիրավչությունն է եւ հանցագործություն է։
Անդրադառնալով եկեղեցու դեմ իշխանության արշավին՝ Լարիսա Ալավերդյանն ասաց․ «Սա հակաեկեղեցական չէ, սա հակաքրիստոնեական է։ Եվ դա կարելի է ապացուցել ամենապարզ ձեւերով, սա հակաքրիստոնեական արշավ է, որը տեղի է ունեցել նաեւ անցյալ դարում՝ բոլշեւիկների կողմից»։
«2018 թվականին այս թիմը եկել է, եւ այն, ինչ մենք ասում ենք՝ կորուստ է, նրանք որպես հաղթանակ են ներկայացնում։ Դժվա՞ր է այստեղից անել եզրակացություն, որ դրա համար են եկել, այսինքն՝ այս թիմը եկել է՝ սպասարկելու թուրք-ադրբեջանական՝ հայերի հանդեպ ցեղասպանական քաղաքականությունը»,- հավելեց նա։ Ըստ Ալավերդյանի՝ հայերի հանդեպ Հայաստանում դրսեւորվում է ռասիզմ․ «Հստակեցնենք՝ այն, ինչ տեղի է ունենում արցախցիների նկատմամբ, դա հայության նկատմամբ է։ Եվ այդ դեպքում մենք արդեն լուծումները կտեսնենք ոչ թե լոկալ առումով, այլ կտեսնենք, որ այսօր վտանգված է Հայաստանը։ Ինչպես Ադրբեջանը որեւէ իրավական հիմք չուներ՝ հարձակվելու Արցախի վրա, նույն այդ հիմքերով նա կարող է հարձակվել Հայաստանի վրա»։
Կարդացեք նաև
Անդրադառնալով արցախցիների վերադարձի իրավունքներին՝ Լարիսա Ալավերդյանն ասաց․ «Այդ ո՞վ իրավունք ունի միջազգային իրավունքով հստակ նշված վերադարձի իրավունքը վիճարկել։ Ինքը դրա համար է այդպես ներվային»։
Ռոզա ՀՈՎՀԱՆՆԻՍՅԱՆ
