Aravot.am-ի տեղեկություններով, ապրիլի 2-ին Արթիկում բնակվող 78-ամյա թոշակառու Բ․Ա․-ն զանգահարել է ոստիկանության օպերատիվ կառավարման կենտրոն՝ հայտնելով, որ իրենց տանից գողացել են 43-ամյա որդուն պատկանող զարդերը։
Նրանց բնակարան է մեկնել ոստիկանության Շիրակի մարզային բարձրաստիճան պաշտոնյաներ՝ մասնավորապես ՔՈԳՎ Շիրակի մարզային վարչության պետի պարտականությունները կատարող Ա․ Ֆիշյանը, բաժնի այլ պետեր, այդ թվում Արթիկի բաժնի պետը։ Որդին հայտնել է, որ ապրիլի 1-ին իրենց տուն է հրավիրել հարևանին ու երեք ծանոթների, որոնցից երկուսը ( ի դեպ, շատ տարօրինակ մականուններ ունեն․ մեկինը «Ծիգռ» է, մյուսինը՝ «Խելառ»)։
Նրանց ներկայությամբ դարակներից մեկից հանել է իրեն պատկանող ոսկեղենը, տեղափոխել իր սենյակ, որից հետո նրանք այդ կահույքը տեղափոխել են ու դուրս եկել տանից։ Այդ ընթացքում նրանցից մեկը վերցրել է ոսկյա զարդերը, որոնց ընդհանուր արժեքը 3 միլիոն դրամ է։
Վերջինս նաև հայտնել է, որ իր տանից գողություն չի կատարվել․ մայրը մշտապես տանն է գտնվում, այլ ոսկին վերցրել է իր տուն հրավիրված անձանցից մեկը։
Կարդացեք նաև
Ոստիկանությունը, գտնելով, որ կատարվել է անձնական ունեցվածքի գողություն, միջոցառումներ է ձեռնարկել գողոնը և գողություն կատարած անձին հայտնաբերելու ուղղությամբ։
Շիրակի մարզային քննչական վարչությունում քրեական վարույթ է հարուցվել։
Նկատենք, որ այս պատմության մասնակից բոլոր անձինք, այդ թվում 43-ամյա տղամարդը, որի զարդերը գողացել են, գործազուրկ են։
