«Կարծում եմ՝ հաջորդ դատական նիստը կարող է լինել վերջինը»,- այսօր Վերաքննիչ դատարանի դիմաց լրագրողների հետ զրույցում ասաց Մասիսի նախկին համայնքապետ Դավիթ Համբարձումյանի պաշտպաններից Գայանե Պապոյանը:
Նրա խոսքով՝ հաջորդ նիստին դատարանը կանդրադառնա պաշտպանական թիմի միջնորդությանը ու եզրափակիչ ելույթներին: Պապոյանը նաև զավեշտալի համարեց դատախազության վերաքննիչ բողոքի փաստարկները․ «Ասում են՝ քանի որ Համբարձումյանները հարազատ եղբայրներ են, Գոռ Համբարձումյանը չէր կարող չիմանալ Դավիթ Համբարձումյանի մոտ առկա հարձակման մասին: Մենք, իհարկե, պնդում ենք՝ Դավիթ Համբարձումյանի մոտ որևէ զենք չի եղել: Այդ մասով է մեր կողմից ներկայացված բողոքը, որ պետք է Դավիթ Համբարձումյանը արդարացվի, առաջին ատյանի դատարանը կայացրել է ապօրինի դատական ակտ»:
Հիշեցնենք, որ Վերաքննիչ դատարանում քննվում է Համբարձումյանի պաշտպանական թիմի ու հանրային մեղադրողի բողոքը։ Պաշտպանական կողմը բողոքարկել է Երևանի քաղաքի ընդհանուր իրավասության դատարանի որոշումը՝ Դավիթ Համբարձումյանին 6 տարի 3 ամիս ժամկետով ազատազրկման դատապարտելու վերաբերյալ։ Իսկ մեղադրող կողմը պահանջում է վարույթի նյութերը փոխանցել նույն դատարան՝ այլ կազմով քննության, բացի այդ՝ Դավիթ Համբարձումյանի նկատմամբ կիրառված 5.000.000 ՀՀ դրամ գումարի չափով գրավը դարձնել պետության եկամուտ։
Կարդացեք նաև
Հիշեցնենք, որ Դավիթ Համբարձումյանը մեղադրվում է 2018 թ. հեղափոխության օրերին Երևանի Հանրապետության հրապարակ շտապող հանրահավաքի մասնակիցների նկատմամբ զենքով բռնություն գործադրելու համար։ Նա մեղադրանքը չի ընդունում։
Արփինե ՍԻՄՈՆՅԱՆ
