Այսօր Հակակոռուպցիոն դատարանն արգելեց «Ուժեղ Հայաստան» կուսակցության առաջնորդ Սամվել Կարապետյանի գործով դատաքննության տեսանկարահանումը: Տեսանկարահանման դեմ առարկեցին թե՛ մեղադրողները, թե՛ Սամվել Կարապետյանի պաշտպանական թիմը:
Նիստը նախագահող դատավոր Վահե Դոլմազյանն արձանագրեց, որ քրեական դատավարության օրենսգրքի համաձայն՝ մեղադրյալի առարկության դեպքում նկարահանում չի կարող իրականացվել ու այդ հիմքով էլ արգելեց տեսանկարահանումը:
Թեեւ դատարանը որոշեց, որ նիստին ներկա լրատվամիջոցները կարող են ձայնագրառում անել նիստից, բայց Կարապետյանի պաշտպաններից Արմեն Գորոյանը ձայնագրության դեմ էլ առարկեց:
Կարդացեք նաև
Պաշտպաններից Արամ Վարդեւանյանն էլ իրենց առարկությունները հիմնավորեց նախընտրական շրջանով՝ պնդելով, որ կարող է քաղաքական հետապնդման գործով տեսանկարահանումը շահարկումների տեղիք տալ:
Ի դեպ, Կարապետյանի մի շարք աջակիցներ, որոնք Հակակոռուպցիոն դատարան էին եկել վաղ առավոտից մասնակցելու Կարապետյանի գործով դատական նիստին, այդպես էլ չկարողացան մուտք գործել դատարան:
Աջակիցներից Նարեկ Սուքիասյանը պատմեց, որ իրենց հայտնել են, որ նիստերի դահլիճում տեղերը սպառվել են, այդ պատճառով աջակիցները չեն կարող ներս մտնել: Ըստ Սուքիասյանի՝ նաեւ ասել էին, որ երբ ԶԼՄ ներկայացուցիչները դուրս գան, կարող են ներս մտնել ու իրենց աջակցությունը հայտնել իրենց առաջնորդին: Սակայն ԶԼՄ ներկայացուցիչների դուրս գալուց հետո էլ նրանց թույլ չեն տվել ներս մտնել:
«Սա եւս մեկ ապօրինություն է մեր ուժի դեմ»,- ասաց Սուքիասյանը:
Արփինե ՍԻՄՈՆՅԱՆ
