«Ընտրական ցուցակում ես չկամ, համագումարում հաստատված է՝ այս ընտրություններում լինելու եմ կուսակցության լիազոր ներկայացուցիչը»,- այսօր կենտրոնական ընտրական հանձնաժողովի շենքի դիմաց լրագրողներին ասաց կուսակցության անդամ Դավիթ Խաժակյանը:
Թե ինչու չի ընդգրկվել ցուցակում հարցին՝ Խաժակյանը պատասխանեց. «Եղել է թիմի հետ քննարկված իմ անձնական որոշումը, այս փուլում իմ մասնակցությունը եւ ներկայացվածությունն այս մարմնում ավելի նպատակահարմար է»:
Կարդացեք նաև
Հիշեցնենք, որ հունիսի 7-ի ընտրությունների նախաշեմին ընտրություններին մասնակցող կուսակցությունների համար մեկնարկել է կենտրոնական ընտրական հանձնաժողով ընտրական ցուցակները ներկայացնելու ժամկետը:
Այսօր «Միասնության թեւեր» կուսակցությունից բացի՝ իր ընտրացուցակը ներկայացրեց նաեւ «Լուսավոր Հայաստան» կուսակցությունը:
Անդրադառնալով ընտրություններում իրենց կուսակցության հաղթելու շանսերին՝ Խաժակյանն ասաց, որ շանսերը կգնահատի քաղաքացին՝ ելնելով այն աշխատանքից, որը տարվել է մինչ այսօր. «Իսկ մինչ այսօրը ի տարբերություն մասնակից շատ ուժերի ՝ «Լուսավոր Հայաստանը» շատ ակտիվ ներգրավվածություն է ունեցել հանրային քաղաքական կյանքում ու ամենակարեւորը՝ մեզ մոտ հովհարային անջատումներ 5 տարվա ընթացքում չեն գրանցվել»:
Ինչ վերաբերում է հետընտրական հնարավոր համագործակցություններին ՝ Խաժակյանը բացառեց ՔՊ-ի հետ համագործակցությունը. «Իշխող ուժի հետ մատաղ ուտելու էլ չենք գնա»:
Արփինե ՍԻՄՈՆՅԱՆ
