«Այս իշխանությունը ՀՀ ապամոնտաժման ծրագիր է գործարկել, հետևաբար կարող է դատապարտել ցանկացած հակաթուրքական և հակաադրբեջանական արարք, բայց երբևէ չենք նկատել, որ դատապարտի արևմտյան Ադրբեջան թեզերը և իր գործողություններով նպաստի՝ հայի հիշողության միջից ջնջվի Եղեռնը, մեր պատմական հիշողությունը»,-Ծիծեռնակաբերդում լրագրողների հետ ճեպազրույցում ասաց «Միավորված հայեր» կուսակցության պատվավոր նախագահ, լիազոր ներկայացուցիչ Նաիրի Սարգսյանը՝ անդրադառնալով ՔՊ-ականների կողմից հնչող հայտարարություններին, որոնցով դատապարտում են Ջահերով երթի ժամանակ Թուրքիայի դրոշն այրելը։
Ըստ նրա՝ Նիկոլ Փաշինյանն իր քայլերով հիմնավորում է, որ սպասարկում է ոչ թե հայկական, այլ ադրբեջանական շահերը։
Կարդացեք նաև
Հարցին՝ եթե այսօրվա իշխանությունները հունիսի 7-ից հետո շարունակեն կառավարել, հնարավո՞ր է լրիվ կորցնենք այս կոթողը, ապրիլի 24-ը վերափոխվի այլ անվամբ, և լիովին ջնջվի ցեղասպանություն բառը մեր պատմության միջից, Նաիրի Սարգսյանը պատասխանեց․ «Չեմ կարծում, որովհետև մենք և դուք թույլ չենք տա՝ անկախ նրանից՝ Նիկոլ Փաշինյանն ուր կլինի և ինչ գործողություններով հանդես կգա։ Հայի ինքնության պահպանման, ցեղասպանության ճանաչման, դատապարտման և պատժի ենթարկման քաղաքականությունն իսկական, էթնիկ հայերով շարունակելու ենք»։
Հարցին՝ «Ուժեղ Հայաստանի» նախընտրական ցուցակում ձեր կուսակցությունից մարդիկ կա՞ն, նա պատասխանեց՝ այո։ Հետաքրքրությանը՝ իսկ Դո՞ւք ինչու չկաք, Նաիրի Սարգսյանը պատասխանեց․ «Ես չեմ ցանկանում լինել, որովհետև պատգամավորական մանդատ ստանալու համար գործունեություն չեմ ծավալել»։
Ուղիղ միացում Ծիծեռնակաբերդից՝ տեսանյութում
Տաթև ՀԱՐՈՒԹՅՈՒՆՅԱՆ
