Այսօր Չարենցավանում 44-օրյա պատերազմում զոհված հերթական հերոսի ծնողն է մոտեցել Նիկոլ Փաշինյանին: «Պարոն Գագիկ Իսախանյանից շատ շնորհակալ եմ, ինձ օգնել է, բայց հարց ունեմ։ Եթե հնարավոր է՝ կարո՞ղ ենք իմ երեխուն արտաշիրմում անենք։ Հուղարկավորված է եղել Հադրութում, արտաշիրիմում եմ արել Ստեփանակերտ։ Հիմա Ստեփանակերտում է, մի հատ ծաղիկ ես չեմ կարում խոնարհեմ»,- ասաց զոհվածի մայրը Փաշինյանին: Ի պատասխան` Փաշինյանն ասաց, լայն հարց է, պետք է քննարկեն, լուծում ստանան:
Փաշինյանին մոտեցավ նաեւ Վարդան Ելինյանը ու ասաց, որ ինքն ու տղան 44 օրյա պատերազմի մասնակից են, 2020-ին որդու դին են փոխանցել իրեն, բայց պարզվում է՝ որդին գերի է ընկել ու հանեց հեռախոսով տեսագրություն ցույց տվեց. «Իմ երեխեն չի զոհվել, իմ երեխեն գերության մեջ է: Այ սա է իմ տղան, աշխարհն էլ, երկիրն էլ քանդվի, սա իմ տղան է, շատ վիդեոներ ունեմ: 2022 թվականին հաղորդում եմ տվել քննչական կոմիտե, մերժում եմ ստացել»,- ասաց 44-օրյա պատերազմի մասնակից Արամ Ելինյանի հայրը:
Փաշինյանին մոտեցան նաեւ անհետ կորած զինվորների հարազատներ. «Այսօրվա դրությամբ մեզ հետաքրքրում է մեր հարցը, քիչ առաջ Անդրանիկ Քոչարյանին տեսանք, ինքը ծալեց այդ հարցը դրեց մի կողմ, ինչի՞»:
«Չի ծալել: Ես այն կարծիքին եմ, որ պետք է հրապարակեն, քաղաքական նյուանսներ կան, դրանք կփակենք ու կհրապարակենք»,- պատասխանեց Փաշինյանը՝ նկատի ունենալով պատերազմի հանգամանքները ուսումնասիրող քննիչ հանձնաժողովի զեկույցը:
Կարդացեք նաև
Արփինե ՍԻՄՈՆՅԱՆ
