«Եթե 2024-ին տրվեինք ճնշումների, գնայինք ուրիշ ճանապարհով, այսօր Իջևանի առնվազն կեսը կորցրած էինք լինելու։ Այն, ինչ անում էին՝ այդ թվում խաչը դոշներից կախած, դա դավադրություն էր ՀՀ պետության դեմ»,-Գանձաքարում ՔՊ քարոզարշավի ժամանակ հայտարարեց ՀՀ վարչապետ Նիկոլ Փաշինյանը։
Նա նշեց՝ այսօր էլ խաչով մարդիկ կան, որ դավադրություն են անում․ «Եթե մեր ժողովուրդն այդ խաչով մարդկանց հետևից գնար, այսօր Իջևանի մեջտեղով էր անցնելու սահմանը՝ լավագույն դեպքում, իսկ այսօր Իջևանն ազատ ու բարեկեցիկ է, Գանձաքարում, Կիրանցում դպրոց կա։ Կիրանցի երեխաներն ապրում են առանց անվտանգության մտավախության։ Ասում են՝ ո՞վ է երաշխավորը, ասում եմ՝ ես եմ երաշխավորը։ ՀՀ-ն է Կիրանցի անվտանգության երաշխավորը»։
Այնուհետև հիշեցնելով այն, որ իրեն մեղադրում էին Ոսկեպարի եկեղեցին, Կիրանցը հանձնելու մեջ, Նիկոլ Փաշինյանը հայտարարեց․ «Հիշում եք՝ ասում էին՝ Ոսկեպարի եկեղեցին տալու են․ ո՞ւր է հիմա Ոսկեպարի եկեղեցին, այն մենք այսօր նորոգել ենք։ Ասում էին՝ Կիրանցը տալիս են, ո՞վ է եղել Կիրանցում սահմանազատումից հետո, քչերն են եղել։ Կիրանցում մենք պաշտպանական կառույցների՝ դեռ բանակի ամրացված շրջանները ձեզ ցույց չենք տվել։ Միայն Իջևան խոշորացված համայնքում ունենք երկու ամրացված շրջան․ բերդեր ու ամրոցներ են, որոնք տասնամյակներով ծառայելու են ՀՀ անվտանգությանը։ Մինչդեռ ասում էին՝ պատերազմ է լինելու 2024-ին»։
Նիկոլ Փաշինյանը հայտնեց, որ Տավուշի մարզի գլխավոր նորություններից է այն, որ մինչև 20 տարեկանների ֆուտբոլի աշխարհի առաջնությունը 2029-ի տեղի է ունենալու ՀՀ-ում՝ այդ թվում Իջևան խոշորացված համայնքում խմբային մրցաշարերից 10 խաղ․ «Մենք Ենոքավանի տակ մինչև 2029 թվականը պետք է կառուցենք մարզադաշտ։ Իջևան, պատրաստվիր 2029-ին աշխարհի առաջնությունը դիմավորելու»։
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարն արված է 2018-ի սեպտեմբերին «Իմ քայլը՝ հանուն Տավուշի» ներդրումային համաժողովից հետո:
