Արցախցի փաստաբան Ռոման Երիցյանի ֆեյսբուքյան գրառումը
Մարատ Եգանյանի և այլ արցախցիների մասով վերանայման ու բողոքարկման ոչ ենթակա դատական ակտերի դեմ ՆԳ նախարարության ներկայացրած բողոքները սովորական ընթացակարգով, սակայն կայծակնային արագությամբ վարույթ ընդունելը, ինչպես նաև վերաքննիչ դատարանի աշխատակազմի հրատապ ծանուցումներն ու հեռախոսագրերը վկայում են այն մասին, որ վերաքննիչ դատարանը, ամենայն հավանականությամբ, փորձելու է «մրցակցության» և «հավասարության» սկզբունքների խախտման պատրվակով արձանագրել ստորադաս դատարանի կողմից արդարադատության բուն էության խաթարում և փաստացի ձևական հիմքերով բեկանել կայացված ակտերը։
Միաժամանակ հիշեցնում եմ, որ բողոքները վարույթ ընդունած դատական կազմի առնվազն երկու դատավորներ՝ դատավոր Բաղմանյանը (7 ակտ) և դատավոր Սահակյանը (4 ակտ), դեռևս 2021 թվականին առաջին ատյանի հենց քաղաքացիական դատարանում կայացրել էին դատական ակտեր, որոնցով ՆԳ նախարարությանը պարտավորեցրել էին արցախցիներին թույլատրել մասնակցել ընտրություններին՝ արձանագրելով վերջիններիս ՀՀ քաղաքացիներ լինելու փաստը։ Նույն ակտերով նաև հստակ նշվել էին, որ դրանք ուժի մեջ են մտնում հրապարակման պահից և ենթակա չեն վերանայման կամ բողոքարկման (տե՛ս ԱՎԴ/2747/02/21, ԱՎԴ/2745/02/21, ԱՎԴ/2726/02/21, ԱՎԴ/2712/02/21, ԱՎԴ/2712/02/21, ԱՎԴ/2716/02/21, ԱՎԴ/2709/02/21, ԵԴ/27333/02/21, ԵԴ/27337/02/21 և մի շարք այլ գործեր)։
Այդ դատական ակտերի կայացումից ի վեր որևէ դատավարական կարգավորում չի փոխվել։ Այսինքն՝ բողոքարկման անթույլատրելիությունը, քննության ժամկետները և ծանուցման կարգը մնացել են նույնը և լիովին համահունչ են այսօրվա իրավակարգավորումներին։
Կարդացեք նաև
Հիշեցնեմ նաև, որ ՆԳ նախարարությունը ֆեյսբուքյան իր էջում մեզ անդրադառնալով նշում է, որ վարչական դատարանի որոշում չկա և գործը վարչական դատարանի քննության ենթակա չէ, մինչդեռ իր բողոքում խոսում է հակառակի մասին։ Բողոքում, ի տարբերության ֆեյսբուքյան և պաշտոնական պարզաբանման, նաև չկա որևէ նշում արցախցիների քաղաքացի չլինելու մասին, որպիսի խորամանկության պատճառն ինձ համար ևս պարզ է։
