«Հրապարակի» զրուցակիցը ԵՊՀ Սահմանադրական իրավունքի ամբիոնի վարիչ, «Ժողովրդական համախմբում» կուսակցության երկրորդ համար Վարդան Այվազյանն է։
– Իսկ Սահմանադրական դատարանի որոշումը սպասելի՞ էր Ձեզ համար:
– Այո, իհարկե, սպասելի էր: Ես կարծում եմ, որ ընդդիմադիր յոթ ուժերը, որոնք դիմել էին Սահմանադրական դատարան, ինձնից լավ գիտեին, որ չի լինելու որեւիցե արդյունք, եւ ամենահետաքրքիրն այն էր, որ ՍԴ ոչ մի դատավոր այս որոշման կայացմանը դեմ չի եղել, եւ հատուկ կարծիք անգամ չի ներկայացվել: Այսինքն` Սահմանադրական դատարանը որոշում է ընդունել միաձայն կերպով, բայց այս առումով ես մի փոքր հույս ունեի, որ գոնե «Բարգավաճ Հայաստան»-ի հետ կապված՝ Սահմանադրական դատարանը կվերականգնի օրինականությունը, որովհետեւ Ընտրական օրենսգիրքը հստակ ասում է` եթե ընտրատեղամասերում ընտրությունների արդյունքներն անվավեր են ճանաչում, ապա անպայման պետք է վերաքվեարկություն տեղի ունենա: Քաղաքացիների ընտրական իրավունքն ամրագրված է Սահմանադրությամբ: Մարդիկ քվեարկել էին կոնկրետ ուժին, ինչի արդյունքում 4 տոկոսանոց ուժ պետք է ձեւավորվեր Ազգային ժողովում, սակայն այդպես էլ չձեւավորվեց: Ստացվում է, որ մարդկանց սահմանադրական իրավունքը ոչնչացրին` ԿԸՀ-ի ձեռքով: Ինչպես տեսանք, Սահմանադրական դատարանն այստեղ էլ խնդիր չտեսավ եւ ԿԸՀ-ի որոշումն ուժի մեջ թողեց: Սահմանադրական դատարանի որոշումները վերանայման ենթակա չեն, դրանց հետ կապված դիտողություններ եւ տեսակետներ չեն լինում, այդ պատճառով էլ անելիք այս մասով չկա այլեւս:
Դավիթ ԳԵՎՈՐԳՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
