Ձկնաբույծները բողոքի ցույց են անցկացնում կառավարության շենքի առջև: Նրանք պահանջում են հանդիպում փոխվարչապետի հետ՝ իրենց պահանջները ներկայացնելու և հետագա անելիքները քննարկելու համար: «Նախարարի հետ չենք ուզում հանդիպել, արդեն հանդիպել ենք: Մեկ ամսից ավելի է՝ մեր հարցին լուծում չի տալիս»,- ոստիկանին ասաց ցուցարարներից մեկը:
Fish producers and aquaculture farmers hold a protest outside the Government of Armenia, demanding solutions to problems affecting the export of their products. Yerevan, Armenia
«Ակնկալում ենք պետական աջակցության ծրագրեր: Կառավարությունն արդեն երկու ծրագիր է իրագործել, սակայն դրանք անիրատեսական են և ոլորտին որևէ դրական արդյունք չեն բերելու: Փորձում են հանրությանը ցույց տալ, թե ոլորտի հետ կապված հարց է լուծվել, բայց ոչ Եվրոպա արտահանելու կանոնակարգերի հետ կապված հարցն է լուծվել, ոչ էլ արտահանման սուբսիդավորման հարցը, որովհետև եվրոպական շուկան մեզ համար դեռևս անհասանելի է: Իսկ այն ծավալները, որոնք այսօր գտնվում են տնտեսվարողների տնտեսություններում, միանգամից եվրոպական շուկայում իրացնելն անիրատեսական է: Խոսքը շուրջ 15 հազար տոննա ձկան մասին է՝ այս պահի դրությամբ, գումարած այն ապրանքը, որը Ռուսաստանի սահմանից վերադարձվել է Հայաստան և այժմ պահվում է սառնարաններում: Մայիսի 15-ից արտահանումը դադարեցվել է»,- լրագրողների հետ զրույցում ասաց ձկնաբույծներից մեկը:
Կարդացեք նաև
Նրա խոսքով՝ ռուսական շուկան ձկնաբույծների ավելի քան 30 տարվա քրտնաջան աշխատանքի արդյունքն է. «Առաջին տարին, երբ Հայաստանից ձուկ-ձկնամթերք է արտահանվել, տարեկան ծավալը մինչև 60 տոննա է եղել, իսկ այսօր հասել է 13 հազար տոննայի: Կառավարության 1-2 որոշումով անհնար է 13 հազարանոց շուկան միանգամից տեղափոխել Եվրոպա: Մենք դեմ չենք եվրոպական շուկա մտնելուն և այնտեղ ապրանք վաճառելուն, դա ողջունելի է, նոր շուկա է, ի վերջո: Բայց մինչև այնտեղ մտնելը մենք գործ ունենք կենդանի օրգանիզմի հետ, որի պահպանումը ծախսեր է պահանջում: Պարոն Պապոյանը խոստացավ, որ աջակցության ծրագիր կլինի, որպեսզի տնտեսությունները պահպանվեն մինչև արտահանման և իրացման հետ կապված հարցերը լուծվեն: Սակայն շուրջ երկու ամիս է՝ այդ ուղղությամբ որևէ քայլ չի արվել, նույնիսկ նախագիծ չի շրջանառվում»:
Fish producers and aquaculture farmers hold a protest outside the Government of Armenia, demanding solutions to problems affecting the export of their products. Yerevan, Armenia
Անդրադառնալով ՍԱՏՄ ղեկավարի ասուլիսում հնչած հայտարարություններին՝ ԵՄ երկրներ հայկական արտադրության ձկնամթերք արտահանելու վերաբերյալ, քաղաքացին նշեց, որ դեռևս մեծ աշխատանք կա անելու:
«Պետք է շուկաներ գտնվեն, շուկան ուսումնասիրվի, մարքետինգ իրականացվի: Այնպես չէ, որ մեքենաների վրա պիտի բարձեն ու տանեն Եվրոպա, եվրոպացիներն էլ իրենց սեղանները բացած՝ սպասում են հայկական ձկանը… Այսպես շարունակվելու դեպքում տնտեսությունները կքանդվեն: Կան տնտեսություններ, որոնք օրական 20-30 միլիոն դրամի ծախս են իրականացնում»,-ասաց նա:
Fish producers and aquaculture farmers hold a protest outside the Government of Armenia, demanding solutions to problems affecting the export of their products. Yerevan, Armenia
Հավաքված ձկնաբույծները նաև զարմանքով նկատեցին, որ նախարարն այցելել է ընդամենը մեկ ձկնաբուծական տնտեսություն և հայտարարել, թե տնտեսվարողի հետ քննարկել է ոլորտի խնդիրները, այն դեպքում, երբ, նրանց խոսքով, մեկ տնտեսվարողը չի կարող ներկայացնել ամբողջ ոլորտը:
«Երրորդ ամիսն է՝ մենք լուրջ ֆինանսական ճգնաժամի առաջ ենք կանգնած: Միայն խոսքեր ենք լսում. գալիս են, ժամանակ են ձգում, մեկ շաբաթ անցնում է, հենց տեսնում են, որ ժողովուրդը պատրաստվում է դուրս գալ, ասում են՝ վայ, մի հատ հանդիպենք, խոսենք: Էլի խոսում ենք, էլի մեկ շաբաթ է անցնում… Տպավորություն ունեմ, որ իրենք էլ չգիտեն, թե ինչ են անում»,- ասաց ձկնաբուծական տնտեսության մեկ այլ ներկայացուցիչ:
«10 տարիների ընթացքում տարբեր ֆորս-մաժորների միջով ենք անցել՝ եղանակային պայմաններ, կուրսի տատանումներ, պատերազմ… Այդ ամենը ձկնաբույծը միայնակ է անցել, ոչ մի աջակցություն չի խնդրել՝ հասկանալով, որ պետության վրա չպետք է ավելի ծանրաբեռնվածություն լինի: Բայց այս փուլում ու այս իրավիճակում դիմանալ չի լինում… Ինչին դիմանաս, դա ֆիզիկական աշխատանք չի, որ դիմանաս… Մի օրինակ բերեմ Եվրոպա արտահանելու հետ կապված: Ենթադրենք, ես 20 տարի է բոքսով եմ զբաղվում, այսօր արթնացել եմ, ասում են՝ եղբայր, դու այլևս բոքսով չես զբաղվում, գնա ֆուտբոլ խաղա, կարո՞ղ եմ միանգամից անցնել ֆուտբոլի»,- տարակուսանք է հայտնում ձկնաբուծական տնտեսություններից մեկի ներկայացուցիչը:
Ձկնաբույծները ցույցն ամբողջությամբ
Գոհար ՀԱԿՈԲՅԱՆ
