«Ուղղակի այն հարցադրումով էի դիմել ՄԱԿ-ին, թե ինչքանո՞վ է այս գործընթացը նորմալ միջազգային հակաահաբեկչական պայքարի համատեքստում, կարո՞ղ է՝ մենք ենք գժվել այս իրականության մեջ, որ չենք հասկանում՝ սա իրականում ահաբեկչություն է, բայց այնքան էլ ահաբեկչության նման չէ։ Ասել եմ՝ խնդրում եմ՝ հետազոտեք այս գործի փաստական հանգամանքները և պարզեք՝ ինչքանով է սա համապատասխանում կամ չի համապատասխանում միջազգայնորեն ընդունված՝ ահաբեկչության սահմանմանը»,- անդրադառնալով այն փաստին, որ ՄԱԿ-ը հրապարակել է «Սրբազան պայքարի» գործով Հայաստանի հետ պաշտոնական նամակագրությունը, և ՄԱԿ-ի փորձագետները կասկածի տակ են դնում ահաբեկչության հոդվածների կիրառումը, Բագրատ սրբազանի և մյուսների գործով դատական նիստի ժամանակ ասաց փաստաբան Տաթևիկ Սողոյանը։
Նա «Սրբազան պայքարի» գործով դիմել էր ՄԱԿ-ի փորձագիտական խմբին։
Փաստաբանը նշեց՝ ՄԱԿ-ի փորձագետներն իրենց՝ ՀՀ կառավարության հետ նամակագրությունում հարցնում են՝ ի՞նչ ռեալ միջոցներ եք ձեռնարկում, որ այս մարդկանց իրավունքները վերականգնվեն․ «Նրանք արդեն իսկ խոսում են պետական քաղաքականության զոհերի իրավունքների վերականգման մասին։ Սա ազդակ պետք է լինի այդ քաղաքական հետապնդումներն իրականացնող յուրաքանչյուր պաշտոնատար անձի հանդեպ, որ քանի շուտ է՝ այս ապօրինությունների շղթան պետք է ընդհատվի, և դրա առաջին քայլը պետք է լինի ամենաինտենսիվ խափանման միջոցի տակ գտնվող անձանց ազատության սահմանափակման վերականգնումը։ Երկրորդ կարծիք չի կարող լինել, որ այս մարդիկ արդար են, և սա հստակ խարան է լինելու ՀՀ արդարադատության համար։ Սա ուղղակի ծաղր է բոլոր այն ահաբեկչության զոհերի նկատմամբ, որոնք այս աշխարհը տեսել է։ Այս կոմունիկացիայով չի ավարտվելու մեր՝ միջազգային հարթակներում ներկայացուցչությունը այս գործի խայտառակությունը ցույց տալու համար։ Այս գործի արժանի պատասխաններն ուղարկվելու են անմիջապես ՄԱԿ։ Միջազգային փարձագետները տեսել են, որ ակնհայտ կամայական ազատազրկում կա»։
Կարդացեք նաև
Նշենք, որ Բագրատ սրբազանի և մյուսների գործով ընթանում է գրավոր ապացույցների հետազոտման փուլը։ Աշխատանքային ժամի ավարտից հետո դատական նիստն այսօր ընդհատվեց։ Կշարունակվի օգոստոսի 13-ին՝ ժամը 15։00-ին։
Բագրատ Սրբազանի և մյուսների գործով դատական նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
