«Մենք մեր ներքին հարցերն ինչո՞ւ պետք է քննարկենք որևէ երկրորդ երկրի հետ։ Դա մեր ներքին հարցն է։ Իսկ ազդակներ․․․ մենք հրապարակայնորեն ասում ենք՝ նոր Սահմանադրության հանձնաժողով ենք ստեղծել․․․, այսինքն՝ դա էդպես թաքուն բա՞ն է, որ ազդակներ են հասել Բաքու։ Եթե մենք քննարկում ենք այդ ամեն ինչը, եթե մենք խոսում ենք, ասում ենք, առաջիկայում հրապարակելու ենք նախագիծը, դատական համակարգի շատ խնդիրներ այդ նախագծի շրջանակներում ենք պատրաստվում լուծել։ Ուղիղ ասում ենք, որ առաջիկայում այդ գործընթացներն առաջ ենք տանելու»,- խորհրդարանում լրագրողների հետ զրույցում ասաց «Քաղաքացիական պայմանագիր» խմբակցության պատգամավոր Հասմիկ Հակոբյանը։
Այսօր Ադրբեջանի նախագահի օգնական Հիքմեթ Հաջիևը հայտարարել էր, որ Երևանից դրական ազդակներ կան՝ ՀՀ Սահմանադրության փոփոխության և «Թուրքիային և Ադրբեջանին ներկայացվող հողային պահանջները հանելու մասին»։ Լրագրողները հետաքրքրվեցին՝ ովքե՞ր և ի՞նչ ազդակներ են փոխանցել ադրբեջանական կողմին։
Թե ինչպես է ՔՊ-ն առաջ տանելու իր ծրագիրը, արդյոք այդ պատճառով են փորձում խորհրդարանում համերաշխ մթնոլորտ ստեղծել, Հասմիկ Հակոբյանը պատասխանեց․ «Լավ կլինի, որ նրանք էլ մեր Հայաստանի հիմնարար շահը տեսնեն Հայաստանի համար կարևոր փաստաթղթերում, բայց 2018-ին էլ ՔՊ-ն ԱԺ-ում ամենափոքր խմբակցությունն էր, բայց ժողովրդի ցանկության բերումով եկան, քվեարկեցին, որպեսզի ՔՊ-ն ունենա վարչապետ։ Եթե ժողովրդի համար ընդունելի լինի մեր մայր օրենքը, ես չեմ կարծում, որ ժողովրդի որևէ ընտրյալ դեմ լինի»։
Սահմանադրության նախագիծը, ըստ ՔՊ-ական պատգամավորի, լայն քննարկման է դրվելու, և դրա ընդունումը ձևական բնույթ չի կրելու, ինչպես նախկինում։ Ինքը պնդում է՝ հայ ժողովուրդը պատմականորեն չի ընտրել իր Սահմանադրությունը։
Կարդացեք նաև
Հստակեցնող հարցին՝ համաժողովրդական ճնշման ներքո սահմանադրական փոփոխություն իրականացնելու սցենա՞րն են ընտրել, պատասխանեց՝ որևէ սցենար չեն ընտրել, ժողովուրդն է իշխանություն, և եթե ժողովուրդն ուզի, որ ունենա այդ Սահմանադրությունը, հետո կհասկանան․ «Իսկ կարող է այդ նախագիծը ներկայացնենք, և պետականամետ մտածողության պատգամավորներ քվեարկեն․ դուք բացառո՞ւմ եք։ Եթե լավ բան լինի, միգուցե իրենք էլ քվեարկեն»։
Նելլի ԳՐԻԳՈՐՅԱՆ
