Հայազգի մարզիկ Լյուսիեն Մարկոսյանը շարունակում է իր հաղթական ելույթները միջազգային մրցասպարեզում։ Կոստա Ռիկայում անցկացված Պանամերիկյան կարատեի առաջնությունում Լյուսիենը 47 կիլոգրամ քաշային կարգում նվաճել է բրոնզե մեդալ՝ զբաղեցնելով պատվավոր 3-րդ հորիզոնականը։
ԱՄՆ-ի ազգային հավաքականի կազմում հանդես եկող Լյուսիեն Մարկոսյանի համար այս հաջողությունը տարիների հետևողական աշխատանքի հերթական արդյունքն է։ Վերջերս անցկացված ԱՄՆ կարատեի ազգային առաջնությունում (USA National Karate Championships 2026) Լյուսիենը զբաղեցրել էր 2-րդ հորիզոնականը՝ երկրորդ տարին անընդմեջ իրավունք վաստակելով ընդգրկվելու ԱՄՆ հավաքականի կազմում։
Կարդացեք նաև
Լյուսիեն Մարկոսյանը պատմում է. «Այս առաջնությունն իր մակարդակով ու մրցակցությամբ լուրջ փորձություն էր։ Ամեն մենամարտ պահանջում էր առավելագույն կենտրոնացում և տակտիկական ճշգրտություն։ Այս մեդալը իմ և մարզչիս տարիների հետևողական աշխատանքի արդյունքն է։ Շնորհակալ եմ իմ ընտանիքին և «Գևորգյան» ակադեմիային անվերապահ աջակցության համար։ Սրանով չենք սահմանափակվելու․ առջևում նոր ու ավելի բարձր գագաթներ են»։
Այս նվաճումն առանձնահատուկ նշանակություն ունի «Գևորգյան» մարտարվեստի ակադեմիայի (Gevorgyan Martial Arts Academy) համար, որի սանն է Լյուսիենը։ USA National Karate Championships 2026 մրցաշարում ակադեմիայի մարզիկները նվաճել էին ընդհանուր առմամբ 9 մեդալ, իսկ Լյուսիեն Մարկոսյանի և Նարեկ Աբրահամյանի ընդգրկումը ԱՄՆ ազգային հավաքականի կազմում դարձել է ակադեմիայի պատմության կարևորագույն ձեռքբերումներից մեկը։
Մարզիչ Էրիկ Գևորգյանը ևս ընդգծել է. «Մեր ակադեմիայի առաքելությունը միայն տեխնիկապես պատրաստված մարզիկներ դաստիարակելը չէ․ մենք ձևավորում ենք կամք, տոկունություն և հաղթողի մտածելակերպ։ Լյուսիենի հաջողությունը պատահականություն չէ, այլ աննկուն աշխատասիրության և օրինակելի կարգապահության տրամաբանական արդյունքը։ Հպարտ ենք մեր սանով և վստահ, որ սա նրա մեծ մարզական ուղու ընդամենը մեկ փուլն է»։
Մեծ արդյունքների հետևում մեկ մրցաշար կամ պատահական մենամարտ չէ․ դրանց հիմքում տարիների հետևողական աշխատանքն է, մարզիկի և մարզչի փոխադարձ վստահությունը, ընտանիքի աջակցությունն ու այն միջավայրը, որտեղ մարզիկին սովորեցնում են հասնել հաջողության սեփական աշխատասիրությամբ։ Լյուսիեն Մարկոսյանի մարզական ուղին հենց այդ սկզբունքայնության և երբեք չհանձնվելու լավագույն ապացույցն է։
