Արցախի կամ արցախահայերի վերադարձի մասով ԱԺ նախկին փոխնախագահ, ՀՀԿ Գործադիր մարմնի անդամ Էդուարդ Շարմազանովը չի ցանկանում հույսեր ներշնչել այս պահին, քանի որ Հայաստանի թիվ մեկ խնդիրն այսօր համարում է ավելին չկորցնելը։ Այսօր «Եռաբլուր» զինվորական պանթեոնում լրագրողների հետ զրույցում Էդուարդ Շարմազանովն ասաց․ «Պետք է Հայաստանի գահավիժումը կանգնեցնել՝ թույլ չտալով անկախության Հռչակագրի չեզոքացումը, որպեսզի հնարավոր լինի խոսել արցախահայերի վերադարձի իրավունքից»։
ՀՀԿ անդամներն այսօր՝ Արցախի Հանրապետության հռչակման 35-ամյակի օրն այցելել էին «Եռաբլուր» զինվորական պանթեոն։
Կարդացեք նաև
ՀՀԿ-ն, ըստ Էդուարդ Շարմազանովի, գտնում է, որ Արցախն ադրբեջանական օկուպացիայի տակ է, քանի դեռ ՀՀ-ում իշխում է այս իշխանությունը, որի համար Արցախն այլևս Ադրբեջան է, և արցախյան հարցն էլ փակված է․ «Մեր՝ քաղաքականության մեջ մնալու առաքելություններից մեկը պետք է լինի այն, որ ապագա սերունդներին ասենք, որ Արցախի հերոսամարտը մեր ժողովրդի մեծ հաղթանակն էր: Դա մեր ազգի փառավոր էջն էր, երբ ազգի փառավոր էջը Հայաստանի կառավարիչն անվանում է թոկ, սա խնդիր է»։
Արցախը վերաազատագրելու հնարավորություն բանախոսի կարծիքով չկա, քանի դեռ Ալիևն ու Փաշինյանն այս քաղաքական «օպերայի» մեջ են․ «Եթե, Աստված չանի, իշխող ռեժիմին հաջողվի անկախության Հռչակագիրը հանել և ալիևյան Սահմանադրությունն ընդունել, ես կարծում եմ՝ դա գրեթե անշրջելի կդարձնի «Եռաբլուր»-ում ննջողների պայքարը»։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
