Նիկոլ Փաշինյանը խայտառակություն է համարում ոչ թե ՊԵԿ նախկին նախագահ Գագիկ Խաչատրյանին անկողնուց պատգարակով դատարան տեղափոխելը և կալանավորելը, այլ դրա շուրջ աղմուկը․ այդ մասին այսօր նա հայտարարեց կառավարության նիստից հետո կայացած ճեպազրույցում։ Լրագրողը հետաքրքրվել էր՝ ինչո՞ւ են Գագիկ Խաչատրյանի նկատմամբ նման դաժան վերաբերմունք դրսեւորում, փոխարենը, իշխանամերձ օլիգարխներ Սամվել Ալեքսանյանի եւ մյուսների նկատմամբ քրեական վարույթներ չկան։
Գագիկ Խաչատրյանի նկատմամբ իր վերաբերմունքը Նիկոլ Փաշինյանն այսպես բացատրեց․ «Նախ ես կարծում եմ, որ մեր իրավապահ համակարգը որևէ պատճառ չուներ գործելու, եթե այս գործողության հիմնավորվածությունն իր համար ակնհայտ չլիներ։ Ընդհակառակը ուզում եմ շնորհակալություն հայտնել իրավապահ համակարգի բոլոր անդամներին՝ սկսած պատգարակը բռնող աշխատակիցներից, որ սիմուլյանտին տարել են ճիշտ այն տեղը, որտեղ պետք է տանեին։ Ընդհակառակը, կարծում եմ, այդ տեսարանները տեսնելով, բոլոր կոռուպցիոներները տեսնեն, որ ինչպես ասել եմ՝ որևէ մեկը չպետք է պլստա, որևէ միլիարդ դոլարանոց սիմուլյանտություն․․․ »։
Մանրամասները՝ տեսանյութում
Կարդացեք նաև
Ավելի ուշ, Գագիկ Խաչատրյանի ունեցվածքի մասին լրագրողի հարցին Նիկոլ Փաշինյանն այսպես պատասխանեց․ «Կարծում եմ՝ ձեր թվարկումը լիարժեք լեգիտիմություն է տալիս մամուլի բոլոր այն հրապարակումներին ու փորձագիտական կարծիքներին, որ նման աշխատանքային վաստակի տեր մարդուն պետք է շտապ կարգով ուղարկել Պալմա դե Մալյորկա՝ վերականգնողական հանգստի։ Հակառակ դեպքում, կնշանակի, որ Հայաստանը սադիստական պետություն է ու կտտանքների է ենթարկում այդ մարդուն»։
Նիկոլ Փաշինյանի կարծիքով, «Երևան-Կենտրոն» ՔԿՀ-ն վատ փոխարինող չէ Պալմա դե Մալյորկային․ «Սա ասում եմ որպես այնտեղ եղած մարդ»։
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
Լուսանկարում՝ Գագիկ Խաչատրյանը դատարանում
