«Մենք տարբեր տեղերում ենք նստել․ ես Արթիկ քրեակատարողականում եմ եղել, ինքն` ԱԱԾ մեկուսարանում։ Բայց, երբ պարոն Կարապետյանի փաստաբանական թիմում էի, ԱԱԾ մեկուսարանի ընդունելությունների սենյակում եմ եղել, միանշանակ կարող եմ ասել, որ մեր բոլոր քրեակատարողական հիմնարկներում պայմանները որևէ աղերս չունեն մարդասիրական նորմերի հետ։ Իրականում Նիկոլ Փաշինյանի ժամանակաշրջանում ավելի շատ ամոթ է նստած-ելած չլինելը, քան ընդհանրապես նստած չլինելը»,- Գագիկ Ծառուկյանի գործով դատական նիստից առաջ լրագրողների հետ զրույցում ասաց ՀՀ ԱԺ «Ուժեղ Հայաստան» խմբակցության պատգամավոր Ռուբեն Մխիթարյանը։
Պատգամավորն ասաց՝ կողմնակից է՝ յուրաքանչյուր անձ, որը ոչ իրավաչափ գործողություն է կատարել, խախտել է ՀՀ Սահմանադրությունը և օրենքները, պատիժ կրի․ «Բայց Նիկոլ Փաշինյանը հասել է նրան, որ կալանքը հավասարեցվել է պատժի։ Ով Նիկոլ Փաշինյանի սրտով չէ, պետք է կալանավորվի, և ցանկալի է, որ շատ վատ տեսարանների հետ մեկտեղված լինի։ Քանի որ նա չի տիրապետում իրավիճակին ու իր տեղում չէ, փորձում է շոուների միջոցով ժողովրդին դրայվի մեջ պահել»։
Լրագրողները հետաքրքրվեցին՝ հաշվի առնելով Նիկոլ Փաշինյանի հայտարարությունները, հնարավո՞ր է գործարար Նարեկ Նալբանդյանի հետ կապված էլ իրավական գործընթացներ սկսվեն, Ռուբեն Մխիթարյանը պատասխանեց․ «Նիկոլ Փաշինյանը մի չակերտավոր լավ հատկություն ունի՝ մարդկանց օգտագործելու և քցելու։ Ես ընդհանրապես չեմ զարմանա, որ Նարեկ Նալբանդյանն էլ նույն բախտին արժանանա»։
Կարդացեք նաև
Գագիկ Ծառուկյանի կալանքը երկարացնելու վերաբերյալ միջնորդության քննությունն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
