COP17-ի մեկնարկին հաշված օրեր են մնացել, սակայն Հայաստանի արտաքին գործերի և միջազգային առևտրի նախարարությունում դեռևս հստակ տեղեկություններ չունեն՝ Ադրբեջանն ու Թուրքիան ինչ պատվիրակություններով կմասնակցեն համաժողովին, կամ ընդհանրապես կմասնակցե՞ն արդյոք։
Այսօր լրագրողների հետ հանդիպման ժամանակ ՀՀ արտաքին գործերի և միջազգային առևտրի նախարարի տեղակալ Ռոբերտ Աբիսողոմոնյանն ասաց, որ այս պահին դեռևս հաստատված չէ այդ երկու երկրների մասնակցությունը։
Լրագրողներից մեկը հետաքրքրվեց, թե քանի պետության ղեկավար է հաստատել իր մասնակցությունը առաջնորդների գագաթնաժողովին:
Կարդացեք նաև
Աբիսողոմոնյանի խոսքով՝ առաջնորդների գագաթնաժողովին գրանցվել է ավելի քան 50 բարձրաստիճան մասնակցություն։ Նա նշեց, որ միջազգային հարաբերություններում առկա մոտեցումները հաշվի առնելով՝ այս պահին ձեռնպահ կմնան մասնակից երկրների անունները հրապարակելուց, սակայն կարող են հաստատել, որ գագաթնաժողովին կմասնակցի ՄԱԿ-ի գլխավոր քարտուղարը։
Ինչ վերաբերում է միջոցառման կազմակերպման ծախսերին, ԱԳ փոխնախարարը նշեց, որ Ազգային ժողովում վավերացման գործընթացից հետո Շրջակա միջավայրի նախարարությունը ներկայացրել է համապատասխան թվերը։ Նրա խոսքով՝ գումարների հետ կապված գործընթացը համակարգում է այդ նախարարությունը, և անհրաժեշտության դեպքում այն հանդես կգա լրացուցիչ մանրամասներով։
Հիշեցնենք, որ COP17-ը Երևանում կմեկնարկի 2026 թվականի հոկտեմբերի 19-ին և կշարունակվի մինչև հոկտեմբերի 30-ը։
Հոկտեմբերի 16-ին նախատեսված է առաջնորդների գագաթնաժողովը, իսկ հոկտեմբերի 18-ին տեղի կունենա COP17-ի բացման արարողությունը։
Արփինե ՍԻՄՈՆՅԱՆ
