«Հայաստանը սկսել է տեսանելի դիրք գրավել ընդերքօգտագործման միջազգային քարտեզում, ինչը մեր կարևոր ձեռքբերումներից է։ Պետք է շարունակենք ջանքերն ուղղել այս հաջողությունն ամրապնդելուն»,- այսօր ՀՀ հանքարդյունաբերական 3-րդ ֆորումի ժամանակ ասաց Տարածքային կառավարման և ենթակառուցվածքների նախարար Դավիթ Խուդաթյանը:
Ըստ Խուդաթյանի՝ այս տարի ֆորումի՝ «Ռեսուրսներից՝ հնարավորություններ» խորագիրն առավել խոսուն է, քանի որ ընդերքօգտագործման ոլորտում օգտակար հանածոն շատ կարևոր ռեսուրս է, բայց թերևս ամենակարևորը չէ։
«Հանածոն, ռեսուրսը երբեմն կարող է առանց գիտելիքի նույնիսկ սպառնալիք լինել պետության համար։ Մեր խնդիրն է համատեղ ջանքերով կարողանալ ոչ միայն կառավարել այդ սպառնալիքը, այլև այն վերածել հնարավորության, հաջողության և տնտեսական կայուն ու երկարաժամկետ զարգացման միջոցի՝ այն տրամաբանությամբ, որ ընդերքօգտագործումը երբեք չխանգարի կենսաբազմազանությանը»,- նշեց նա։
Նախարարի խոսքով՝ առաջիկա քայլերը հնարավորություն կտան մեկ քայլ առաջ գնալ։
Կարդացեք նաև
«Արդեն սկսվել է թվայնացման գործիքների լայն կիրառումը՝ ոլորտի զարգացման նպատակով։ Ընդերքօգտագործման բոլոր տեսակի թույլտվությունների տրամադրումն իրականացվելու է թվային գործիքների միջոցով։
Ընթացքի մեջ է նաև երկրաբանական ծառայության ստեղծումը։ Արդեն 2027 թվականի վերջին կունենանք երկրաբանական ծառայություն, որը մեզ հնարավորություն կտա մեկ կետից կառավարել և վերահսկել ոլորտում առկա խնդիրները»,- ասաց Խուդաթյանը։
Արփինե ՍԻՄՈՆՅԱՆ
