Նիդերլանդների պատվիրակությունը՝ Սաննե Կրաուդի գլխավորությամբ, ակտիվորեն մասնակցում է Երևանում անցկացվող կենսաբազմազանության համաշխարհային համաժողովին։ Երկրի դեսպանությունը ներկայացնում է բնապահպանական նախաձեռնություններ և կարևորում մինչև 2030 թվականը ստանձնած նպատակների իրականացումը։
Երևանը հյուրընկալում է ՄԱԿ-ի Կենսաբազմազանության մասին կոնվենցիայի կողմերի 17-րդ համաժողովը՝ COP17-ը, որի ուշադրության կենտրոնում բնության պահպանությունն է և կենսաբազմազանության կորստի դեմ պայքարը։ Միջազգային այս կարևոր իրադարձությանը ակտիվորեն մասնակցում է նաև Նիդերլանդների Թագավորությունը։
Հոկտեմբերի 17-ին ՀՀ-ում Նիդերլանդների Թագավորության դեսպան Մարիկե Մոնրոյ-Վինթերը մասնակցել է համաժողովին ընդառաջ կայացած Առաջնորդների գագաթնաժողովի բացման արարողությանը՝ Նիդերլանդների պատվիրակության ղեկավար Սաննե Կրաուդի հետ, որը Նիդերլանդների գյուղատնտեսության, ձկնորսության, սննդի անվտանգության և բնության նախարարության միջազգային կենսաբազմազանության քաղաքականության թիմի ղեկավարն է։
Դեսպանը բարձր է գնահատել միջոցառման մեկնարկը՝ ընդգծելով դրա նշանակությունը Հայաստանի և բնության պահպանության միջազգային ջանքերի համար։
«Տպավորիչ մեկնարկ էր։ Հիացած եմ այս միջոցառմամբ։ Համաժողովը նշանակալի է Հայաստանի համար և կարևոր ներդրում է բնության պահպանման գործում։ Նիդերլանդները շարունակելու է սատարել Հայաստանին այս ճանապարհին»,- նշել է Մարիկե Մոնրոյ-Վինթերը։
Բուենոս Այրեսից՝ Երևան
Հոկտեմբերի 18-ին դեսպանն անդրադարձել է COP17-ի նշանակությանը՝ այն կապելով նաև իր դիվանագիտական անցյալի հետ։ Կարիերայի վաղ տարիներին նա մասնակցել էր Բուենոս Այրեսում կայացած կլիմայական համաժողովին, իսկ այժմ ականատես է Հայաստանի՝ միջազգային բնապահպանական խոշոր միջոցառում հյուրընկալելու կարողությանը։
Դեսպանի խոսքով՝ Հայաստանը կարող է հպարտանալ նման լայնամասշտաբ համաժողով կազմակերպելով և աշխարհին ներկայացնելով իր բնությունն ու կենսաբազմազանությունը։
Հոկտեմբերի 19-ին մեկնարկած COP17-ի առիթով Մոնրոյ-Վինթերը տեսաուղերձով խոսել է կենսաբազմազանության պահպանության համաշխարհային նշանակության մասին։
Նա ընդգծել է, որ կենսաբազմազանությունը պարզապես բնության պահպանություն չէ․ այն կյանքի հիմքն է։ Աղտոտվածությունն ու բնական ռեսուրսների գերշահագործումը նպաստում են կենսաբազմազանության նվազմանը։ 2022 թվականին երկրները համաձայնության են եկել մինչև 2030 թվականը դրա վիճակը բարելավելու նպատակների շուրջ։
Դեսպանի գնահատմամբ՝ COP17-ը կարևոր հանգրվան է այդ նպատակների իրականացման առաջընթացը գնահատելու համար։ Չնայած արդեն ձեռնարկված քայլերին՝ աշխարհը դեռ բավարար չափով չի առաջադիմել, և անհրաժեշտ են ավելի մեծ ջանքեր՝ սահմանված նպատակներին հասնելու համար։
Նիդերլանդների տաղավարը և «EcoPhoto Hunt»-ը
Հոկտեմբերի 19-ին Նիդերլանդների դեսպանության տեղական թիմն այցելել է համաժողովի Կապույտ գոտի, որտեղ ներկայացված է նաև Նիդերլանդների տաղավարը։
Դեսպանության նախաձեռնություններից է «EcoPhoto Hunt» լուսանկարչական մրցույթը։ Դրա միջոցով բնապահպանական թեման ներկայացվում է լուսանկարչության լեզվով՝ հանրության ուշադրությունը հրավիրելով բնության արժեքի և պահպանության անհրաժեշտության վրա։
COP17-ի միջոցառումներն անցկացվում են Կապույտ և Կանաչ գոտիներում։ Դեսպանության տրամադրած տեղեկատվության համաձայն՝ Կանաչ գոտում նախատեսվում է ներկայացնել մրցույթի լավագույն տասը աշխատանքները, որոնցից կընտրվեն երկու հաղթողները։
Այս նախաձեռնությունը համաժողովի բնապահպանական օրակարգը հանրությանն ավելի հասանելի դարձնելու միջոցներից է՝ գիտական և քաղաքական քննարկումներին զուգահեռ խրախուսելով նաև անհատական ստեղծագործական մասնակցությունը։
Երբ դիվանագիտությունը երկխոսություն է նաև մամուլի հետ
Այս նյութի պատրաստման ընթացքում «Նիդերլանդական օրագիրը» դիմել է Նիդերլանդների դեսպանությանը՝ ճշտելու երկրի մասնակցության, պատվիրակության և նախաձեռնությունների վերաբերյալ տեղեկությունները։ Դեսպանությունը սիրահոժար տրամադրել է իր հրապարակային հաղորդագրություններն ու անհրաժեշտ պարզաբանումները՝ հնարավորություն տալով ընթերցողներին ներկայացնել ավելի ամբողջական պատկեր։
Միաժամանակ հարկ ենք համարում նշել, որ Նիդերլանդներում Հայաստանի դեսպանությանն ուղղված մեր բազմաթիվ հարցումները մինչ օրս պատասխան չեն ստացել։ Այս տարբերությունը կարևոր է ոչ թե երկու դեսպանությունների աշխատանքը համեմատելու ինքնանպատակ ցանկությամբ, այլ հանրային հաղորդակցության սկզբունքի տեսանկյունից։
Դիվանագիտական ներկայացուցչությունների աշխատանքը միայն պաշտոնական միջոցառումներին մասնակցելը չէ․ այն նաև հասարակության և լրատվամիջոցների հետ երկխոսությունն է։ Լրագրողական հարցումներին արձագանքելը նպաստում է տեղեկացվածությանը, թափանցիկությանը և Հայաստանի ու Նիդերլանդների միջև հարաբերությունների ավելի լիարժեք լուսաբանմանը։
Երևանում անցկացվող COP17-ը բնության պահպանության շուրջ միջազգային համագործակցության կարևոր փորձություն է։ Նիդերլանդների մասնակցությունը ցույց է տալիս, որ այդ օրակարգը ներառում է ոչ միայն միջպետական քննարկումներ, այլև հանրային նախաձեռնություններ։ Իսկ մինչև 2030 թվականը ստանձնած նպատակների իրական արժեքը որոշվելու է նրանով, թե որքանով դրանք կվերածվեն շոշափելի գործողությունների։
«Նիդերլանդական օրագիր»
Նյութը պատրաստվել է Նիդերլանդների Թագավորության դեսպանության տրամադրած տեղեկատվության հիման վրա։
Նկարներում՝ Նիդերլանդների Թագավորության դեսպան Մարիկե Մոնրոյ-Վինթերը, Նիդերլանդների պատվիրակության ղեկավար Սաննե Կրաուդը
